Ондакысе пелашем дене кыл уке, но икшывемлан ик жап алиментым тӱленам, вара илышыштем нелылык лекмеке чарненам. Ынде парымем пӧртылтынем. Колынам ыле, алимент шотышто мыняр парым погынымым Госуслуги гочат пален налаш лиеш. Чынак мо?
МИХАИЛ.
Шернур район.
Марий Эл Республикысе тӱҥ суд приставын алмаштышыже элгӧргӧ службо майор Алексей Михайлович Бочкарев умылтара:
– Йоча-влакым але ача-авам ончымылан алимент шотышто парым уло але уке да мыняр погынымым, тыгак могай регионышто исполнительный производство кайымым Суд пристав-влак федеральный службын официальный интернет-сайтыштыже «Банк данных исполнительного производства» ужашыште пален налаш лиеш.
Тылеч посна чыла информацийым Госуслуги гочат налаш йӧн уло. Порталыште Россий ФССП-н «Ход исполнительного производства» сервисше пашам ышта. Тудын полшымо дене физический да юридический лица-влак, тыгак нунын представительышт исполнительный производство шотышто информацийым (тышке судебный пристав-влакын кучылтмо мерыштат пурат) онлайн налын кертыт:
- исполнительный производствым тарватымын амалжым,
- тӱлышаш окса кугытым,
- парымлан еҥ-влак шотышто палемдыме чарак да нунын погышт нерген.
Электрон услугым налаш манын, Госуслуги порталыште «Ведомства» ужашыш кусныман. Вара «ФССП» ужашым муман да «Предоставление информации о ходе исполнительного производства (онлайн)» ойырыман. Ойырымо услуго дене окна почылтеш. Услугым заказатлымеке, исполнительный прозводство кайыме нерген увер 30 секунд жапыште лектеш. Тудым печатлен лукташ але аралаш лиеш. Тыгак Госуслуги портал гоч исполнительный производство шотышто парымым тӱлаш лиеш.
Эше теве мом палемдыман. Госуслуго порталыште алиментым тӱлыдымӧ-влакын реестрыштым ыштыме. Закон дене келшышын, реестр Россий ФССП-н официальный интернет-сайтыштыже вераҥдыме «Банк данных исполнительных производств» сервисын ужашыжлан шотлалтеш.
Госуслуги дене пайдаланыше кажне еҥ ты сервислан эҥертен кертеш – порталыште авторизацийым эртыман огыл, документ-влак данныят огеш кӱл. Алимент шотышто парым улмым тергаш айдемын фамилийже, лӱмжӧ, ачалӱмжӧ, тыгак шочмо кечыже кӱлыт. Но реестрыш административно але уголовно мут кучаш шогалтыме але алиментым тӱлыдымылан розыскыш увертарыме еҥ-влак веле логалыт.
Сервис алиментым тӱлыдымӧ деч шылше-влакым шке обязанностьым шукташ кумылаҥдаш виктаралтын. Тудо тыгак айдемын окса шотышто ответственный улмыжым аклаш полша, мутлан, иктаж сделкым ыштыме годым, да алимент шотышто парымым петыраш таратен кертеш.
1 июньлан Марий Элыште илыше 1251 еҥ алиментым тӱлыдымӧ-влак реестрыш пурталтын.
Ты жапланак Управленийыште алиментым кӱрын лукмо шотышто исполнительный производствым шуктымо дене кылдалтше 2600 исполнительный производство уло.