Йошкар-Оласе Фестивальный микрорайонышто у йочасадым чоҥат.
Тымарте кум пачашым оптен шуктымо. Тудым ты кундемыште илыше еш-влак шукертсек вучат.
Йочасадым 180 йочалан келыштарат. Объектым посна проект почеш ыштат: тушто 9 группылан пӧлем, спортзал ден музыкальный зал, кочмывер лийыт.
Икшыве-шамычлан оласе моло микрорайоныштат йочасад чоҥалтеш. Тыгак тений «Семья» нацпроект почеш вич йоча тӧнежым капитально олмыктышаш улыт: Оршанке посёлкысо «Родничок», Волжск оласе 8-ше номеран «Ягодка», Звенигово район Красногорскийысе «Сказка», Медведево район Арбаныште «Радуга» да Юрино посёлкышто «Теремок» йочасадлам.
Ты паша «Единый Россий» партийын Калык программыжлан кӧра шукталтеш.