Тыгай подвигым спецоперацийын участникше Алексей Ашкельдин 2024 ий апрельыште ыштен. Тудо тушманын талын шогымыж жапыште тулан вер гыч сусыргышо йолташыжым нумал луктын да илышыжым арален коден. Каласыман, шкежат сусыргышо лийын. Ты подвиглан тудым Святой Георгийын орденже – IV степенян Георгиевский Ырес – дене палемденыт. А пытартыш заданийым шуктымыжлан – Патырлык орден дене, но колымекыже.
Эртыме корно
Алексей Ашкельдин 1976 ий 23 июльышто Волжский район Черкысола ялеш шочын. Шарача школышто 11-ше классым тунем лекмеке, Россий ДОСААФ-ыште водитель профессийым налын. А 1995 ийыште армийыш каен. Срочный службыжым Чита оласе пограничный войскаште эртен.
Толмекше, землякна Татарстан кундемысе Зеленодольск олаште Серго лӱмеш заводышто автоматический сваркын операторжылан пашам ышташ тӱҥалын. Варажым Алексей элнан рӱдолашкыже каен, тушто «Москва-Сити» оролышо предприятийыште шуко жап тыршен. Адакат пӧртылын да Озаҥысе ик организацийыш ороллан пурен. Книгам лудаш йӧратен, поснак историй нерген, сандене шуко пален да келге шинчымашан лийын. Йоча-шамычымат книгалан шӱмаҥден.
«Шке каем»
Юл кундемын шочшыжо спецоперацийыш мобилизаций тӱҥалмекак, 2022 ий октябрьыште, логалын. Тушко тудо шке кумылын да кокымшо тӱшка дене пырля каен.
«Самырык-шамычым наҥгаят, мом нуно ыштен моштат. Лучо мый каем, можыч, эргым вара огыт наҥгай, олмешыже лиям, тек армийыш кая», – ойлен тунам ешыжлан.
Спецоперацийыште мотострелковый подразделенийыште служитлен. «Шкет» позывнойым налын. Тидыже Ашкельдин фамилий дене келшен толмыла чучын.
Военнослужащийым боевой задаче-влакым кӱлеш семын да шкем чаманыде шуктымыжлан эше ик кугыжаныш награде, «За воинскую доблесть» медаль, дене наградитленыт. Тудым Алексей отпускыш толмыж годым конден.
Тылеч вара пел ий служитлымеке, 2024 ий 10 ноябрьыште, Алексей эше ик гана боевой заданийым шукташ каен да пӧртылын огыл. Тылеч вара эн ончыч тудым увер деч посна йомшылан шотленыт, а вара – колышылан. А колымо кечыжлан лач 10 ноябрь манын палемдыме, вуйым пыштыме верже – Луганск Калык Республикысе Лисичанск ола.
Марий еш
Марий ешыште кум йоча шочын. Алексей ден Надежда пелашыже вашла изи годсек паленыт, коктынат Черкысолаште шочын-кушкыныт, лачак кок тӱрлӧ уремыште иленыт. Нуно 2003 ийыште ушненыт да 21 ий пырля лийыныт.
Ынде кугурак эргыштат, Данил, армий гыч толын, Ленинград областьысе ик военный частьыште служитлен. Кызыт Озаҥыште пашам ышта. 19 ияш Ангелина Озаҥысе ик вузышто юристлан тунемеш. Илышыште чын сеҥышаш манын шонен, ты профессийым ойырен налын. А Витя эргышт эше школышто тунемеш, 8-ше классышке коштеш.
Надеждан марлан толмекше, икмыняр ий ача-авашт дене пырля иленыт. Кызыт Алексейын шочмо суртыштыштак улыт. Ава Зеленодольскысо Серго лӱмеш заводышто охраныште караул начальниклан ынде 19 ий пашам ышта. Мо оҥайже: школ деч вара Надежда художественный училищыш пурен, но тунем пытарен огыл. Сӱретлыме мастарлыкше кугурак шочшыжо-влакланат куснен.
Ашкельдинмытын кудывечыштышт ондак турникышт лийын. Тушто ача шке эргыже-влак дене пырля капым нӧлтен. А моло годым Алексей пӧртыштӧ отжиманийым ыштен.
Сай пример
Алексей ачажын корныжым тошкен, манашат лиеш. Вет Иван Константиновичым 17 ияш улмыж годым 1943 ийыште Кугу Отечественный сарыш призыв почеш налыныт.
Эн ончыч моло рвезе-влак дене тудо пырля Костромаште тунеммашым эртен. А вара Иван Ашкельдиным III Белорусский фронтыш колтеныт. Смоленск олам налме годым Вязьма станице воктене снаряд пудешталтын. Тыге самырык рвезе контузитлалтын. А 1944 ий мучаште госпитальыш логалын. Сеҥымаш кечымат тушто вашлийын.
Иван Константинович 78 ий марте илен, 2005 ийыште ты тӱням коден каен. Тӱрлӧ вере пашам ыштен. Алексейын аваже, Татьяна Григорьевна, Иван Констиновичын кумшо пелашыже лийын. Нунын куд йочашт шочын, Алексей – эн пытартыш.
Иван Константинович ден Алексей Иванович Ашкельдинмытын лӱмышт, тушман ваштареш талын шогымышт пырля служитлыше, лишыл да тыглай палыме еҥ, поро пошкудо-влакын шарнымашешышт курымешлан кодеш.