Тыгай лӱман концерт лиеш 6 мартыште Йошкар-Оласе Ленин лӱмеш тӱвыра полатыште. Тудым уста гармонист-влак Александр Марков ден Сергей Пакеев эртарат. Тидын вашеш Татарстан кундем марий рвезе С.Пакеев дене илышыже, творчествыже нерген мутланашышна.
Марий сем чонем лыпландара
Агрыз район Буймо селан чолга гармонистше да мурызыжо нерген Марий Элыштына шукертак палат. Репертуарыштыже утларакшым такмак-влак улыт. А такмак ден гармоньым шукын, поснак марий калыкна, йӧратат. Сергей Пакеевлан гармонь – эн ӱшанле да поро йолташыже. Чыла манме гаяк мурым тудо гармонь сем почеш йоҥгалтара.
– Тиде калык семӱзгар деке йӧратымаш йочам годымак шочын. Ачамын шольыжо – Андрей Пакеев – уста гармоньчо. Тудо мыйым гармонь дек шӱмаҥден. Кузе шокталта, кузе муралта – шулен колыштат. Моткоч кугу тау Андрей азилан! А икымше гармоньым мылам Геннадий кугызам (чӱчӱ) пӧлеклен. Тудо йошкар тӱсан, изи паҥга-влакан, но келге кугу йӱкан лийын. Кызытат тудым аралем.
Гармонь – тиде куан, шинчавӱд, шыргыжмаш, кумалтыш. Арам огыл калыкыште тиде юзо семӱзгар нерген илыше семын ойлат. Гармонь шортеш, гармонь мура. Мый гармоньым шоктем, да чонем куана, эмлалтеш, кумылем нӧлталтеш. Тудын деч ик кечат ом ойырло, эре пеленем ӱшанле йолташем, – ойла Сергей.
Чон-кумыл паша
С.Пакеев марий эстрадыште – 2015 ий годсек. Тудо И.С.Ключников-Палантай лӱмеш тӱвыра да сымыктыш колледжысе хоровой отделенийын вупускникше. Марий рвезе школышто тунеммыж годымак музык тӱням йӧратен шынден. Ты йӧратымаш таче кечынат тудын дене пырля. Ик жап «Эреҥер» калык муро ансамбльын артистше лийын. Кызыт Пакеев командыж дене республикысе районлаш гастроль дене коштеш.
– Мылам музыкант лияш – чон-кумыл паша. Мурым, семым возен, историй шочеш. Творчество дене илем. У мурпашам дене шкежат шулдыраҥам. Сем кеч-кушто да кеч-кунам ушышкем пурен кертеш. Тунам тудым мондаш огыл манын, вигак возем. Вара поро йолташем Нина Изибаевалан колыштыктем. Тудо мылам акым пуа. Ты сем могай темылан келшен толеш манын мутланымеке, Нина мутым воза. Нина дене ик ялыште шочын-кушкынна. Творческий тандемланна ынде ятыр ий. Тудын лу почеламутшылан семым келыштарыме. Чылажымат мый мурем, – палдарыш гармонист.
Шочмо вер – эн шерге, шочмо вер – ава
Сергей 2013 ий годсек Марий Элыште ила да шкенжым Марий кундемын эргыжлан шотла. Тудо манеш:
– Шочмо-кушмо ялем эре шӱмыштем, ушыштем. Тушто илыше калыкым пагалем да йӧратем. Тушто авам, ачам, родем, йолташем-влак илат. Нунын деч посна, конешне, йокрокланем, сандене яра жапем годым шочмо кундемышкем миен толашак тыршем.
Кызыт Марий Эл чонемлан лишыл. Пашам ыштем. Концерт гастроль дене тӱрлӧ ялыш, олаш коштам, тыгак еш пайремлашке гармонь сем почеш мураш ӱжыт, мый уло кумылын келшем.
Айста муралтен колтена чылан пырля улмына годым
Сергей Пакеевын творчествыже чынжымак шкешотан. Тудо калык семӱзгар дене калык семым шокта да такмак-влакым мура. Илышыште ойго эре уло. Кумылым нӧлтышӧ муро кеч ик жаплан нелылык нерген мондыкта, илаш тарата, вийым пуа. Муро эмла.
– Такмак – илыш гыч лекше муро. Тудо – мыскара сынан, тыгодымак келге темым тарватыше, шонаш таратыше да чоным кандарыше. Такмак – ойыртемалтше жанр. Сандене, очыни, репертуарыштем шочмо кундемемын, Марий Элысе да одо вел такмак-влак улыт.
Тачысе кечылан шкемын зритель-влакым муынам манын шонем. Нунылан кугу тау! Нунылан кӧра мый профессионал семын эшеат кушкам. Шонымашем шуко да тӱрлӧ. Кажне артист, кугу олаш лектын, шке творчествыж дене палдарынеже. Мый тидын шотышто ом ойыртемалт. Эше чыла ончылно! – ойла Сергей.
Уста гармонист да мурызо пӱртӱс лоҥгаште лияш йӧрата. Кечыйолын шокшыжым шижын, памаш вӱдым подылын, чодыра, пасусо, ер серысе яндар южым шӱлалтен вийым налеш. Яра жапыштыже колым кучаш коштеш, кеч колжым ок коч.
Еш альбом гыч налме фото.