Курыкмарий районысо Йоласал школын выпускникше, СВО-што вуйым пыштыше Алексей Козловым шарныме лӱмеш Геройын Партыжым пайремлын почыныт.
Изинек поро да пашаче кушкын
Алексей ты кундемысе Алатай ялыеш шочын. Ик ийым темымекыже, ешыже Йоласал селаш илаш куснен. Рвезын кум ият пелаш улмыж годым аваже кок изи йоча дене шкет кодын, садлан тудлан ондакак кугемашыже логалын.
– Эргым изинек поро чонан кушкын. Шӱжарже верч эреак азапланен, тудым ончаш полшымаште эн ӱшанле полышкалышем лийын. Мӧҥгысӧ пашам да моло сомылым ответственно шуктен. Коҥгашкат олтен, пӧртым ырыктен, кӱмыж-совламат мушкын, арулыкымат эскерен…
Теве тунемаш йӧратен огыл, лучо иктаж-могай сурт сомылым тӧрлаш пуыман. Визымше классыште тунеммыж годым пу гыч пӱчкеден тӱрлӧ ӱзгарым ыштылаш кумылаҥын. Мыланем 8 Март пайремлан шкатулко ден подносым шке пӱчкеден да пӧлеклен.
Алексей спорт дене пеҥгыде кылым кучен, кучедалмаш спорт секцийыште шуаралтын, физически пеҥгыде, виян кушкын. Шарнем, шымше классыште тунеммыж годым верысе амбулаторийым чоҥаш полшымаште шӱжарже дене пашам ыштеныт, ковыштам погымашкат коштыныт. Ыштен налме оксашт дене мӧҥгылан телевизорым налыныт, – каласкала Алексейын аваже Елена Софроновна.
Элым аралеш каен
Школ деч вара Алексей Козлов Йошкар-Олашке Марий радиомеханический техникумыш электриклан тунемаш пурен. 2009 ийыште тудым армийыш налыныт. Службым Йӱдвел Осетийыште артиллерийский войскаште эртен. Армий деч вара вахте йӧн дене частный охраныш пашаш кудалыштын.
– Пашам ышташ тӱҥалмекыже, эргым мыланем шочмо кечемлан Абхазийыш путёвкым пӧлеклен. Тылеч ончыч ик ганат нигушкат миен коштын омыл. Армий деч вара Алексей шкенжым гражданский илышыште муаш тыршен, но ала-могай ситыдымашым шижын. Тыге 2020 ий 4 мартыште Россий Обороно министерстве дене контрактым пеҥгыдемден да Угарман кундемыште танковый войскаште службым тӱҥалын.
Жап эртымеке, «Элерон-3» БПЛА-н операторжылан тунемын. 2022 ий 6 майыште эргымын служитлыме группыжым спецопераций кайыме кундемыш колтеныт. Тушто тудым БПЛА пӧлкан командиржылан шогалтеныт, – радамла ава.
Козлов сӧйыштӧ кок гана нелын сусырген. Службышто пеҥгыде да патыр салтак улмыжым эреак ончыктен. Йолташыже-шамыч землякнан ыштен кертдыме сомылымат илышыш шыҥдарен моштымыжым палемденыт.
– Видеокыл дене чӱчкыдын йыҥгыртен. Икмыняр гана отпускышто лийын. Толмыж годым верысе черкыш полшаш, школыш Патырлык урокым эртараш коштын. Йоласал черкылан кугу чаҥым налаш полшен. Тудо моткоч поро чонан лийын.
Икана мемнан 62 салтакнам, нунын коклаште эргымат лийын, тӱжем наре тушман авырен налын. Штурмовик-шамычлан кӧра тушеч лектын сеҥеныт. Мый эргымын да моло салтак-влакын илышышт верч эреак Юмым сӧрваленам. Моло-влакымат тидым ышташ йодынам.
2022 ий 3 сентябрьыште Алексей ончыкылык пелашыж дене палымым ыштен, 2023 ий 27 майыште нуно возалтыныт. Тудын ешым погаш да икшыве-влакым кушташ ик эн кугу шонымашыже лийын, – чонжым почо тулык ава.
«Вувер кува» пытарен
2024 ий 6 сентябрьыште Алексей Козлов кок сослуживецше дене 70 килограмман ныл детонаторым шупшыктеныт. Тыгодым тушманын «Баба яга» дронжо йымаке логалыныт. Чот кугу пудешталтмаш лийын – иктат илен кодын огыл.
– Ты кечылаште чоныштем каласен моштыдымо нелылык озаланен, пуйто ава шӱм ала-могай томаша лийын кертмым ончылгоч шижын. 7 сентябрьыште кастене ӱдырем родо-влак дене мӧҥгем толыныт. Шочшем вес олаште ила, садлан кастен толмыжлан ончычшо ӧрынат колтенам ыле. Нуно Алёшан уке лиймыж нерген уверым конденыт улмаш. Пален налмеке, шкемын шӱмем изишлан кырымым чарнен огыл, мом ойлаш да мом ышташат пален омыл.
Тудын апшым 6 ноябрьыште «Всех скорбящих Радость» пайремлан веле конден шуктеныт. 7 ноябрьыште Йоласал селасе черкыште улденна. Пытартыш корныш селасе Герой-влак лӱмеш аллейыште ужатенна, – ойла Елена Софроновна.
Герой Алексей Козловым шарнен, тысе часамлалан «Всех скорбящих Радость» лӱмым пуэныт. Салтак верысе Александр ача дене сай кылым кучен, часамлам чоҥымо шотышто пырля сомылым вораҥдареныт. Тыге лектын – Алексей Козловым лач ты пайрем кечын отпеватленыт, садлан Александр ача тудын лӱмжым ӱмыраҥдаш шонен, тыге темлен.
Службым эртымыж годым Алексей Козловым патырлыкым да лӱддымылыкым ончыктымыжлан «За отвагу» да Александр Суворов лӱмеш медаль-влак дене суапландареныт. Колымекыже, Патырлык орден да II cтепенян «За воинскую доблесть» медаль дене палемденыт.
«Батон» позывноян землякна лишыл еҥже да йолташыже-влакын чоныштышт курымешлан илаш тӱҥалеш. Аваже, шӱжарже да родыжо-влак тудлан ятыр почеламутым, серышым пӧлекленыт. Тыге чон гыч лекше шомак-влак тудын деке вашкерак миен шуыт, манеш ойганыше ава.
Еш альбом гыч налме фото-влак.