Татарстан кундем Агрыз район Кöлегеш ялыште илыше Лидия Ишманова Ишманов фамилий нерген каласкалыш.
Лидия Геннадьевна Агрыз районысо Шуар (рушлаже – Байтуганово) ялеш шочын-кушкын. Кöлегеш ялышке Ишмановмыт ешыш 2000 ийыште марлан толын (ÿдыр фамилийже – Николаева).
– Ишманов фамилий кузерак лектын да шарлен толмо нерген мый Игорь пелашем деч йодым, эше сайынрак мариемын аваже Галина Анатольевна каласкалыш. Тудат пеш раш йодыштын огыл, но икмыняржым шоҥгырак еҥын ойлымыж гыч палемден кодыш.
Ончыч нуно изи Ожбуй ялыште иленыт, вара икмыняр пагыт гыч Кӧлегешыш кусненыт. Тиде фамилий Ожбуй ял дене кылдалтын. Кызыт Ишманов фамилиян шагал тукым палдырна. Ожбуй ялыште ожно Эшмак тукым илен. Эшмак кугезе кочан кум эргыже лийын: Эшман, Юмакай, Эсак. Шочмо суртышко кугу эргыжым, Эшманым, илаш коден, кок эргыжым посна илаш луктын. Марий лӱм Эшман Ишман фамилийыш савырнен.
Ожно Э буква дене марла лӱмденыт, вара Э буквам рушла И алмаштен. Тыге рушла Ишманов фамилий шочын. Кызыт тиде фамилий Агрыз районысо марий яллаште веле вашлиялтеш. Мемнан деч мӱндыр огыл Кадрек ялыштат Ишманов фамилиян тукым ила.
Тыгак икмыняр шонымаш почеш, Ишманов фамилийын шкенжын келгытше да значенийже уло. Фамилий немыч могырым кугезе кидмастар дене (тумо дене кыл), славян могырым мӱкш да еврей калыкын поянлык дене кылдалтын.
Каласен кертына: мемнан кундемысе Ишманов фамилий мӱкш дене чак кылдалтеш, арамлан огыл Игорь марием – мӱкшызӧ (тиде специальностьлан лӱмынак тунем лектын). Шке сурт-печыштына мӱкшым кучена, мӱй ужалашат да шкаланнат ситышын.