«Герои Отечества» музейно-патриотический рӱдерым почмылан ноябрьыште кок ий темеш. Ты жапыште рӱдер ятыр сомылым виктарен шога, тӱрлӧ мероприятийым эртара.
Вашлиймаш
Нунын кокла гыч иктыже – «Служу Отечеству» Российысе акцийыш ушнымаш. Марий Элыште СВО ветеран ден тунемше—влак коклаште вашлиймашым эртарат.
Ты акцийым «Защитники Отечества» кугыжаныш фонд ден Российысе «Знание» обществе «Служу Отечеству» июньышто тӱҥалыныт. Тудын геройжо-влак – посна военный операцийын участникше-влак.
Проектын мероприятийже-влак «Молодёжь и дети» нацпроект почеш эртаралтыт. Тыге йоча-влак вашлиймашла гоч элнам чотрак йӧраташ, аклаш тунемыт. Тыгай вашмутланымаш нунылан пеш кӱлешан.
Марий Элыште «Служу Отечеству» акций регионысо Правительствын полшымыж дене эртаралтеш. «Герои Отечества» музейно-патриотический рӱдер, «Защитники Отечества» фондын республикысе филиалже Патырлык урокым эртареныт.
Тушто специальный военный операцийын участникше, «Абилимпикс» национальный чемпионатын призёржо Герман Чуршуков передовойышто лиймыж нерген каласкален да палемден: кызытсе пуламыр – тиде тачысе технологийын сарже, садлан мемнан эллан у Кулибин-влак кӱлыт.
СВО ветеранже-влак профессионал мастарлык шотышто коклаште «Абилимпикс» чемпионат тений Татарстаныште кокымшо гана лийын. Тыгай таҥасымаш-влак Россий Президент Владимир Путинын инициативыж почеш эртаралтыт. Г.Чуршуков «Разработка и сборка БПЛА» компетенцийыште шке шинчымашыжым ончыктен. Тылеч посна тушто Звенигово район гыч Александр Николаев «Слесарь санитарно-технических систем» компетенцийыште да Йошкар-Ола гыч Станислав Тютев «Водитель автомобиля» компетенцийыште таҥасеныт.
Рӱдерын пашаже
Рӱдерым вуйлатыше Евгений Грозновын мутшо почеш, кызыт тыште тудо да эше кок научный пашаеҥ, ик эскерыше пашам ыштат.
Тений пелийыште рӱдерыште 450 утла мероприятийым ямдыленыт. Чылаже 142 экскурсийым эртареныт. Ветеран ден военнослужащий-влакым ӱжын, вич Патырлык урок лийын. Нуно «Защитники Отечества» кугыжаныш фондын регионысо филиалже, «За Россию» Калык фронт» Российысе мер толкын да республикысе ветеран-пограничник-влакын «Застава» советышт полшымо дене эртаралтыт.
– Кажне ийын тоштерын фондшо пойдаралтеш, – ойла Евгений Андреевич. – Мыланна армий илышыште кучылтмо атрибутым, шевроным да молымат кондат. Чыла арвер историй да тӱвыра поянлык улмыжо шотышто процедурым эрта. Варажым тудым Россий Федерацийысе Кугыжаныш каталогышто регистрироватлат да тудлан шкенжын посна номержым (шифр) пуат.
Тоштер Икымше тӱнямбал сарлан, Кугу Отечественный сарлан да специальный военный операцийлан пӧлеклалтын. Тыште нунын икгайлыкышт нерген ойлат. Тыге уна-шамыч элыштына мо ышталтмым сайынрак умылат. Каласыман: тоштерыш кугыеҥ ден самырык-влакат, олашке унала толшо-шамычат пурен лектыт, школыш да йочасадыш коштшо-влакат толыт.
Рӱдерыште тӱрлӧ квиз, акций лиедат. Тылеч посна пашаеҥ-влак тӱрлӧ программым ямдылат. Тудын дене тоштерыште палдарат да тӱрлӧ вере лектын коштыт.
Тыште спецоперацийыште вуйым пыштыше-влакын авашт, пелашышт дене шуко мутланаш логалеш. Тыгак спецоперацийыште вуйым пыштыше землякна-влакын биографийыштым ямдылен, тоштерыш вераҥдат.
Эльвира Терентьева.
Рӱдерын архивше гыч налме фото-влак.
Подпись: «Подсвечники» мастер-классым эртрыме годым.
Тоштерысе экспозиций.
Рӱдерым вуйлатыше Евгений Грознов ден пашаеҥ Степан Новожилов.