26 февральыште Марий тӱвыра рӱдер Медведево район Пӱкшерме ялысе тӱвыра пӧртыштӧ йоча-влаклан Ӱярня пайремым эртарен.
Йошкар-Оласе «Падыраш» команде, Морко район Волаксола ял гыч «Ӱдыр кумыл», Медведево район Шойбулак гыч «Мелначи» да Параньга район Кугу Пумарий гыч «Самырык тукым» команде Ӱярня йӱлам палымыштым, марла моторын мутланен, мурым мурымо да куштымо мастарлыкыштым ончыктеныт, коҥга мелнам кӱэштын конденыт. Чылан чолга улыт, пайремлан сайын ямдылалтыныт. Кугу Пумарийысе командым поснак палемдыде огеш лий. Ӱдыр-рвезе-влак чылт артист улыт. Вожылде, ӧрде чыла конкурсыш ушненыт. Тавалтат туге – йолвундашыштышт тулойып коеш. Тӱмыр да гармонь сем почеш мастарлыкыштым тичмашынак почын пуэныт. Мо оҥайже, рвезе-шамыч калык семӱзгар-влак дене шке шокташ тунемыныт. Командын участницыже Диана Морозован мутшо почеш, школышто перерыв годым коридорышто погынен, шке гыч марла муралтена да семӱзгарым шокталтат. Могай молодец улыт! Шочмо йылмыштым, йӱлаштым, тӱвыраштым изинек пагален кушкыт. Ончылгоч каласена, «Самырык тукым» команде Ӱярня пайрем годым эртаралтше конкурсышто икымше верым сулен.
Кугезе коча-кована ойленыт: «Ӱярня пайрем жапыште йӱштӧ мунчалта». Сандене мунчалтымаш деч посна шошо шумо пайрем нигунам ок эрте. Ӱярня курык гыч кумылан чыла еҥ мунчалтен кертын. Тыгодым участник-влак ик вере кандырам шупшын ӱчашен модыныт, вес вере ечым да «маскайолым» чиен, вашке коштыныт, кумшо вес тӱрлӧ калык модыш дене модын. Весела лийын.
Кажне команде Ӱярня кувам ыштен толын. Окавий, Эрвий, Овдакий, Чапле кувандай лӱман лийыныт. Ӱярня кувам пайрем мучашлан йӱлалтеныт, тыгодым чылан рӱж осалже кайже, черже кайже, манын ойленыт.
Ӱярня йор-йор, мелан чыж-чыж! Телым ужатымеке, да шошым вашлиймеке, участник-шамыч шокшо чай да ӱян мелна дене сийлалтыныт.