Марий Эл Республикын военный комиссарже Кирилл Солодовник 2026 ийысе призыв нерген журналист-влак дене шукерте огыл эртаралтше вашлиймаште палдарен.
Воинский обязанность нерген законыш вашталтышым пуртымо деч вара призыв 1 январьыште тӱҥалын да идалык мучко шуйна. Призыв почеш службым эртышаш рвезе-шамычым военкоматыш ончычсо семын палемдыме жапыште веле огыл ӱжыктен кертыт.
Учётно-призывной пашашке вашталтышым пуртымо шотышто Россий Правительстве кок пунчалым луктын, палдарен военком. Мутлан, военный службым эрташ решений элна мучко идалык жапыште пашам ышта. Палемдыме жапыште призывник службым эртышаш жап дене каен шуктен огыл гын, вес черет тудлан медосвидетельствованийым коштман огыл. Тазалык шотышто нелылык лекме, ешыште кокымшо але утларак икшыве шочмо призыв шотышто решенийым чараш амалым ышта.
Законыш вес вашталтышым пуртымо нергенат К.Солодовник палдарен:
– Рвезе-шамыч, военный службым эрташ призыв нерген нунын шотышто решений уке гын, добровольческий формированийлаш каен кертыт. Тыгай формированийлаште лийме жаплан нунылан отсрочко пуалтеш. Тудым личный деласе документ да воинский часть гыч справке негызеш пуат. Добровольческий формирований составыште боевой действийлаште пел ий наре участвоватлыше-шамычын призыв почеш службым эртыме деч утлаш правашт уло.
Службым эртыме верыш призывник-влакым молгунамсе гаяк идалыклан кок гана колтат: 1 апрель гыч 15 июль марте да 1 октябрь гыч 31 декабрь марте.
Йошкар-Ола гыч икымше тыгай отправке 10 апрельыште лийын. Тений Марий Эл Республик гыч 800 наре самырык еҥ призыв почеш службым эрташ кайышаш.
Ончычсо семынак нуным СВО кайыме верыш огыт колто.
Теният призыв да военный службым эртыме верыш колтымо кугыжаныш информационный системе – Воинский учёт шотышто единый реестр – почеш эртаралтеш. Рвезе-шамычлан электронный повесткым колтымо нерген увертарымаш-влак Госуслуги порталысе личный кабинетышкышт ӱмаште шыжым толаш тӱҥалыныт.
К.Солодовникын палемдымыж почеш, тидыже армий деч шылаш тӧчышӧ-шамычымат «муаш» полша. Вет реестрыште повесткым вераҥдыме гын, призывниклан Россий гыч лекташ чаралтеш. Повесткым колтымо деч вара кӱлешан амал деч посна военкоматыш 20 кече жапыште миен огыл гын, чаралтше мера-влак пурталтыт. Нунын коклаште – физлицам ИП семын регистрироватлаш, физлицам налогым тӱлышӧ семын налог органыш учётыш шогалташ, кредитым налаш договорым ышташ, кусараш лийдыме погым кугыжаныш кадастр учётыш шогалташ да тудлан правам регистрироватлаш, водительский права дене пайдаланаш да транспортым регистрироватлаш.
Лекше йодышым призывник-влак да нунын ача-авашт шке районысо военкоматыш миен рашемден кертыт. 8 апрель гыч «шокшо линий» телефон пашам ышта – (88362) 45-03-98.
Авторын фотожо.