Советский район гыч Евгений Есменеевын ӱмыржым спецоперацийыште тушманын пуляже Донецк Калык Республикысе Авдеевка ола воктене кӱрлын. Землякна СВО-ш приказ почеш логалын.
Изинек чолга
Евгений изинек усталык шӱлышан, спортлан шӱман кушкын. Тудо Йошкар-Оласе 30-шо номеран школын хореографий классыштыже 5-ше класс марте мастарлыкшым таптен, дзюдо спортышто шуаралтын. Ешыже Советский посёлкыш илаш куснымеке, тысе школышто шинчымашыжым нӧлтен. Спортым кудалтен огыл, посёлкышто Евгений эрыкан кучедалмаш дене шуаралташ тӱҥалын. Рвезе сайын тунемын, тӱрлӧ мероприятийыште чолгалыкше дене ойыртемалтын.
Армийыш миен толмеке, Санкт-Петербургыш фитнес тренерлан тунемаш пурен. Но 2021 ий апрельыште элнан Обороно министерствыж дене контрактым пеҥгыдемден да Вооружённый Вий радамыш ушнен. Евгений Абхазийыште артиллерий войскаште кугурак наводчик лийын.
Приказ почеш
2022 ий мартыште землякнан частьышкыже СВО-ш колтымо шотышто кӱшыч приказ толын. Тыге 21 мартыште 2500 наре салтакым специальный военный операцийыш наҥгаеныт. Есменеев пел ий наре Херсонысо направленийыште Новая Каховка ола воктене тушман ваштареш кредалын. Лӱддымылыкым да патырлыкым ончыктымыжлан тудым Суворовын медальже дене палемденыт. 2022 ий шыжым шочмо кундемышкыже пӧртылын, но чонжо дене тудо шкенжым салтак-шамыч дене пырля сӧйышто гына ужын. Тыге 2023 ий 7 сентябрьыште уэш контрактым подписатлен да спецоперацийыш каен.
Рвезе Донецк Калык Республикыште Авдеевка оласе направленийыште Водяное села верч кредалын. Икымше боевой заданийым шуктымо годымак шкенжым пеҥгыдын ончыктен. Тидланже тудым взвод командирын алмаштышыжлан, штурмовой отрядын командиржылан ойыреныт. Заданийым шуктымыж годым ойыртемалтмыжлан землякнам «За боевые отличия» наградылан палемденыт.
Чаманен каласыман, Евгенийын самырык ӱмыржым снайперын пуляже 2023 ий 29 ноябрьыште пытарен. Тудо ятыр жап увер деч посна йомшо салтаклан шотлалтын. Лач ик ий гыч веле капшым шочмо кундемышкыже конден тоеныт. Евгений Есменеевым «За отвагу» медаль дене колымекыже палемденыт.
Ава чон
Надежда Анатольевна – салтакын аваже. Шочшыжын капшым ик идалык кычалын. Ты жапыште тудын чоныштыжо мо ышталтмым Юмо веле пала. Есменеевмыт ешын кугу ойго дене тӱкнымыжым шотыш налын, Советский районыс администраций верысе Шочмо элым аралыше-влакын ешыштын комитетыштым (КСВО) Надежда Есменеевалан вуйлаташ темлен.
– 2025 ий годсек ты пашам шуктен шогем. СВО-што лишыл еҥыштым йомдарыше да кычалше-влаклан тӱрлӧ семын полшаш тыршем. Мыйын ик эргым лийын, тудым ик идалык кычалынам, капшым шочмо кундемыш конден тояш манын, кушко гына шуын омыл. Тидын дене шке соцкылысе лаштыкыштем палдаренам. Садлан шукышт мемнан историйна нерген паленыт. Тыгак фронтлан тӱрлӧ семын полшымемымат туштак ончыктенам. Поро кумылым ончыктышо фондым почын, салтак-влак деке шкеак кудалышташ шоненам. Но тидлан АНО-м (автономный коммерческий огыл организаций) почаш кӱлын. А тидыже налог да молат…
Ты жапыштак районысо администраций Советский районышто КСВО-м мыланем вуйлаташ темлен. Нуно ты сомылым шуктен кертмемлан ӱшаненыт, – каласкала Надежда Анатольевна.
Полышым погат, шкеак намиен пуат
2025 ийыште Есменеевмыт грузовой машинам налыныт да гуманитарный полышым погаш тӱҥалыныт. Ты суапле пашам шуктымао толкынлан Надежда Анатольевна «ZOV Надежды» лӱмым пуэн. Есменеевмыт погымо сатум шкеак специальный военный операцийыште Советский кундем гыч участвоватлыше рвезе-шамычлан кидышкыштак намиен пуат.
– Рвезе-шамыч мемнан деке могай полыш кӱлмӧ йодыш дене шкеак лектыт. Пелашем дене коктынак спецопераций кайыме кундемлашке кудалыштына. Ончычракше тылзылан ик гана, вараракшым кварталлан ик гана миен толаш тӱҥалынна. Ик тылзе жапыште тӱрлӧ сатум поген шукташ нелырак, но тыршена. Тидын шотышто мыланна Советский посёлкысо 2-шо да 3-шо номеран, Алексеевский ден Вечын школла, Ургаш лицей полшат. Тыгак районышто илыше ятыр еҥ поро кумылым ончыкташ эре ямде. Могай сатум кондат, чылажланат куанена – палдара Н.Есменеева.
Шочмо Элым аралыше-влакын ешыштын комитет СВО участник-влаклан да нунын лишыл еҥыштлан тӱрлӧ полышым ышта. Увер деч посна йомшо салтак-шамычым кычалаш, юридический да психологический йодышым рашемдаш, неле ситуаций годым полша. Надежда Анатольевнан ойлымыж почеш, нуно ойгыш логалше еҥ-влак дене йӱдшӧ-кечыже кылым кучат. Вуйлатыше патриотизм шӱлышан тӱрлӧ мероприятийыш чолган ушна. Советский кундемыште шочын-кушшо, элнан тыныслыкше верч СВО-што вуйым пыштыше салтак-влак нерген шарнымаш илыже манын, кугу пашам шуктен шога.
Икманаш, Надежда Анатольевна мо дене кертеш – чыла дене полшаш тырша. Но тудын тӱҥ направленийже – гуманитарный полышым поген, намиен пуымаш да увер деч посна йомшо салтак-влакым муаш полшымаш, манеш. Вет Надежда Есменеева увер деч посна йомшо шочшыжым ик идалык кычалын. Ты жап тудлан чылт шучко омо гае лийын. Садлан тыгай ситуацийыш логалше еҥ-влакым нигӧ деч сайын умыла. Чолга ӱдырамашын пашаже тек ушнен толеш да историйыште кугу буква дене палемдалт кодеш.