Кундемыштына республик кӱкшытан икымше агрофорум эртаралтын. Тудо Марий Элысе ялозанлык аланыште тыршыше ятыр специалистым чумырен.
Мероприятийлан кугу ончерым чумырымо, ярмиҥгам келыштарыме, уна-влакым ӱжмӧ. Тушто Марий Элысе науко да образований, кочкышым ыштен лукшо предприятий, цифровой технологий, кушкылым да вольыкым ончен куштымо сомыл, у оборудований да шапаш ужаш-влак дене палдарыме.
Агрофорумышто Российысе специалист—шамычат лийыныт. Нуно кундемнан ялозанлык пашажым сайын акленыт. Ты мероприятий икте-весе коклаште опыт дене пайлалташ, иктешлымашым ышташ, инвестицийым савыраш, пырля пашам ыштыме шотышто кутырен келшаш йӧным ыштен. Тылеч посна аграрий-шамычлан кугыжаныш могырым могай полыш-влаклан эҥерташ лийме нерген лончыленыт.
Марий Элысе Ялозанлык да кочкыш сату министерствын да Марий Элысе Кугыжаныш Погынын сайтышт гыч налме фото-влак.