Лена ден Костя икымше классыш кайымышт годым палыме лийыныт. Нунын ик классыш логалме историйыштат шкешотан. Классыш икшыве-влакым шеледыме годым Лена ден Костям алакузе монденыт. Тыге нуным ик туныктышо шкеж деке тунемаш налын.
Костя тунамак Лена деке ала-могай шижмаш улмым умылен. Латкок ийыш шумеке, ӱдырлан тидын нерген ойлаш шонен пыштен. Тылеч вара тунемше-влак жапым утларак иквереш эртараш тӱҥалыныт: книгагудыш, мӧҥгӧ да моло вере эре пырля коштыныт. Классыште тунемше-шамыч йӧратыше мужырым мыскылен огытыл, мӧҥгешла, шке шижмашышт деч лӱддымыштлан нуным пагаленыт.
Шымше классыште тунеммышт годым, кушкын шумекышт, вате-марий лийыт манын, вашла товатленыт. Костя Леналан вӱргене гайке гыч шергашымат пӧлеклен. Но тудым парняш чиен кошташ йӧнанжак лийын огыл, садлан Лена шкатулкышто арален.
Школ деч вара ӱдыр ик олашке, рвезе вес олашке тунемаш каеныт. Тидыже ӱдыр-каче коклаште йӧратымашым эшеат пеҥгыдемден веле. Нуно кок арнялан ик гана вашлийыныт. А ончылно ӱдыркачым кок ийлан ойырлымаш вучен. Рвезым армийыш наҥгаеныт. Тунамат Лена йӧратыме таҥже деке кудалыштын. Кок ийлан чылаже кандаш гана Костя деке миен коштын. Армий гыч толмеке, Костя Ленам вигак марлан налын. Нунын ӱдырышт шочын.
Кызытат ты мужырым ончен куанет, ятыр еҥ нуным пагала. Костя ондакысе семынак Ленам йӧрата. Нуно ынде кумло ий мыйын пошкудем улыт. Ялыште Костя ден Ленан историйыштым палыдыме еҥ укеат, очыни. А мый тыгай пошкудем-влак улмылан куанен илем. Садлан нунын нерген тыландат каласкалаш шукертак шоненам ыле.
ЗИНА О.
Килемар район.