Оршанке районысо волонтёр-влак спецоперацийыште порысым шуктышо землякна-влаклан моткоч кугу полышым пуэн шогат.
Упшо гыч тӱҥалын
Полыш нерген Оршанке район Упшо селаште илыше да продавецлан ыштыше Елена Шатдинова каласкалыш.
Эше 2022 ий майыште ты села гыч еҥ-влак маскироватлалтме сеткым пидаш тӱҥалыныт. Ынде ты сомылым шым ял шотан илемыште шуктат. Шукерте огыл лешийын костюмжым ургаш Упшо мастар-шамычак тунемыныт. Кызыт тудым кум ешыште ямдылат: Ирина ден Сергей Кисилёвмыт, Эльвира Кудрявцева, Любовь Тищенко.
Оршанке район гыч Валентина Тимиряева (тудын пелашыже СВО-што вуйым пыштен) сусыргышо-влак деке Донецкысе госпитальышке волонтёр семын полшаш кудалыштеш. Тудо, толмекыже, тушто салтак-шамычын йымал вургемышт уке манын каласен. Тунам уло район дене, кӧ урген кертеш, чыланат тидым шукташ пижыныт. А шукерте огыл ожоговый отделенийыште улшо салтак-шамычлан туникым ургаш тӱҥалыныт. Лишыл жапыште икымше партийым колтат.
Тачысе тимуровец-влак
Самырык тукымын полшымыж нерген Елена Шатдинова тыге каласкалыш:
– Кугу полышым Оршанке посёлкысо Шуко профилян колледж пуа. Ме шкенан чатышкына мо кӱлешым возена, нуно эре мемнан дене пырля улыт. Колледж гычат йымал вургемым ургымашке ушненыт. Ты пашам педагог, студент да моло пашаеҥыштат шуктеныт.
Тыгак студент-влак Чебурашкым пидыт, кажне пайремлан видеосаламлымашым ямдылат. СВО гыч нунылан тауштымо шомакым чӱчкыдынак колтат.
Кодшо кечылаште колледж Херсон направленийысе разведчик-влакын йодмашыштым шукташ полшыш. Туныктышо ден пашаеҥ-влак Звениговысо шыл комбинатын ик яшлык тушонкыжым (дрон дене лач тыгайым колтен кертына) пуышт. Эше кок коробкам еҥ-влакын оксашт дене нална. Чыла тидым кум шагат жапыште поген шуктышна.
Теве ик рушарнян Софья Чеснокова лӱмеш Йоча усталык рӱдерысе «Ритм» объединенийыш коштшо икшыве-влак нашлемник-влакым пидаш тунемыныт. Ты пашам Кугу Ӧрша ял гыч «Оршинские мастерицы» команде гыч Светлана Ефремова да воспитатель Лариса Беляева ончыктеныт, пырля пӱчкеденыт, тасмам кылдыштыныт, вуйчиемым тасмаш да резинкыш погеныт. Чылаже 9 нашлемникым ямдыленыт. Йоча-влак тудым гуманитарный полышлан кондымо арверышт дене пырля кок коробкаш чумыреныт.
Пырля гына!
Волонтёр пашам шуктышо-влакын штабыштым Оршанке район администрацийыштак вераҥдыме. Ондакысе вуйлатыше Александр Леонидович Плотниковат моткоч ура чонан пӧръеҥ лийын, штабыш чӱчкыдын пурен, эсогыл нумалаш, моло пашаланат полшен.
Елена Шатдинова машинаж дене тӱрлӧ вере кудалыштеш, пашалан мо кӱлешым заказатла, наледа. Тудо районын надырже нерген тыге каласкалыш:
– Мемнан полышна салтак-шамыч деке тӱрлӧ семын миен шуэш. Теве Медведево район гыч землякна дене танкист-влаклан маскироватлалтме сеткым ынде кокымшо ий колтедена. Тудо эре мемнан деке толын наҥгая.
Кодшо кечылаште Параньга район гыч ик ӱдыр Херсон направленийысе разведчик-влаклан вич сеткым йодын. Десантник-шамычын ушемышт, Калык фронт, «За Марий Эл» фонд, шкенан ракетный дивизий да моло денат кылна уло. Йодмаш пура, ме увертарена да ик-кок арня жапыште уло районна дене поген пуэна.
Тӱрлӧ куэмым рулон дене Моско областьыште заказатлена. А Сергей лӱман водитель тушеч мыланна тудым ынде нылымше ий конден пуа, тидлан оксам ок нал. Материалым пӱчкедаш мыланна станокым Марково школышто технологийым туныктышо Андрей Зеленов ыштен пуэн. Рулон-влакым ме Отар школышто пӱчкедена.
Чумыр район ик тичмаш семын полша. Телевизорышто але вес вере кӱлешан арвер нерген ужына, меат ыштен кертына мо шоналтена да пашалан пижына. Илен лекташ полшышо кидшолым ышташ мастер-классым муын тунемна, тудым пидаш тӱҥална. Мамык диск ден парафин гыч, шыштым ешарен, йӱлалтен колташ розжиг манмым ыштеденна. Тудыжо йӱран годымат йӱла да салтак-шамычлан кугун полша. Теве госпитальысе ожоговый отделенийыште неле ситуаций нерген пален нална гын, туникым кузе колташ ӧрынна да шкеат каяш ямде лийынна. Тидым Калык фронт Донецкыш шумеш наҥгаен.
Ме палена: илыш ончычсо семын огеш лий, сандене рвезе-влак, нунын пеленак улмынам шижын, тушман ваштареш шогышаш улыт.