Шукерте огыл «Марий Эл» Ий полатыште ий ӱмбалне фигурный мунчалтымаш спорт дене «Йошкин пырыс» таҥасымаш лийын. Тушто Дильназа Хакимова ший медальым налын.
Тунемеш, ончыко кая…
Дильназа Йошкар-Олаште шочын-кушкын, 30-шо номеран школышто кандашымше классыште шинчымашым пога. Вич ияшак ий ӱмбаке лектын. Ӱдыр Марий Элысе Олимпийский резерв спортшколын фигурный мунчалтымаш пӧлкаштыже мастарлыкшым тапта.
– Телевизор дене фигурист-влакын мунчалтымыштым ончаш моткоч йӧратенам. Вара ача-авам ий ӱмбалне фигурный мунчалтымаш секцийыш ӱдыр-рвезе-шамычым погымо нерген увертарымашым ужыныт да мыйым пробный занятийыш конденыт. Тушто тергеныт да налыныт. Кызыт шӱжаремат ты спорт дене заниматла. Ме республикын сборный командыштыже улына.
Икымше тренерем Ольга Сергеевна Антропова лийын, кызыт Анна Дмитриевна Бондарева, Аделина Никитична Черной, Фарида Рамазановна Куклина дене шуаралтам, – каласкала Дильназа.
Фигуристке шуко жапым спортлан ойыра. Тудо арняште куд кечым кум шагат дене тренироватлалтеш. Спортсменке икымше спортивный разрядлан нормативым шуктен. Кызыт, южышто тӧршталтен, кум гана тичмаш савыртышым (тройные прыжки: тулуп, сальхов, флип, лутц, риттбергер, аксель) ышташ тунемеш. Тыгай элемент-влак фигурный мунчалтымашыште тӱҥ тӧрштылмашлан шотлалтыт. Тудым ышташ спортсменлан технически виян, чот писе да тале лийман.
– Икымше таҥасымаш-влак тачат шарнымашыште улыт. Кеч-могай спортсмен, очыни, сай лектыш верч тырша. Мыят тыгак. Идалык мучко ятыр соревнованийыште шкем тергем. Республикысе, регион-влак кокласе, Российысе турнирлашкат лекташ тыршена. Ты жапыште Озаҥ, Шупашкар, Угарман, Санкт-Петербург, Альметьевск, Саранск да моло олалаштат лийынна. Кажне ийын спортшколын воспитанникше-влак дене вес кундемлаште сборышто мастарлыкнам нӧлтена, – ойла фигуристке.
Ешын йӧратыме спортшо
Хакимовмыт ешыште ий ӱмбалне фигурный мунчалтымаш спортым поснак аклат. Нуно Российысе тӱҥ старт-влакым эреак эскерат. Тыгай годым уло еш телевизор ончылно погына да таҥасымашым онча.
– Ий ӱмбалне шуко жапым эртараш чот чытыше лийман. Вет спортсменлан ала-мыняр шагат дене коньки дене мунчалтыман. Садлан ты спортым ойырышо ӱдыр але рвезе эн ончыч пашаче кумылан улмыж дене ойыртемалтеш да тидын дене пагалымашым сула. Тыгак спортышто дисциплине, чакныдымаш, цельыш шуаш тыршымаш деч посна кугу кӱкшытыш шуаш огеш лий, – радамла Д.Хакимова.
Дильназа Хакимова чонлан келшыше спорт дене заниматла. Арняште куд кечым ий ӱмбалне мунчалта гынат, яра жапым пайдалын да веселан эртараш тырша. Тыгай годым йолташ-влак дене вашлиям, моло аланыште шинчымашем пойдарем, манеш фигуристке.
Д.Хакимован альбомжо гыч налме фото.