Ирина Михайлова гай чолга самырык еҥ-шамыч дене палыме лиймеке, марий йылмын ончыкылыкшо верч тургыжланымаш пуйто йомеш. Ирина – Татарстан Республик Агрыз районысо Пелемеш ял гыч. Марий ӱдыр шочмо йылмыж дене моткоч моторын мутлана, марий улмыж дене кугешна да шке калыкшын тӱвыражым жапла. Туддене тений Марий самырык тукым слётышто палыме лийна.
Йоча годсек чулым
И.Михайлова тений Буймо кыдалаш школым шӧртньӧ медаль дене тунем пытарен, ынде Озаҥ олаште Юл кундемысе физический культур, спорт да туризм кугыжаныш университетын студентше. Ирина изинек чолга кушкын. Школышто тӱрлӧ мероприятийыш ушнен, марий йылме да литератур дене олимпиадылаште шинчымашыжым терген да ончыл верыш лектын.
– Йочам годсек ялысе тӱвыра пӧрт пеленысе «Ош висвис» ансамбльыш коштынам. Такшым Буймо школыш шым марий ял гыч икшыве-влак тунемыт. Кажныштыже шке марий ансамбль уло: мутлан, Буймышто – «Эр ӱжара», Кӧлегешыште – «Курмызак олык». Ме, ансамбльлаш коштшо ӱдыр-рвезе-влак, марла мурен-куштенна веле огыл, тыге шке калыкнан тӱвыражым пален да аклен, марий улмына дене кугешнен, изинек кушкынна, – манеш ӱдыр.
Пашаштат, спортыштат – ешге
Ешыште Ирина – изирак икшыве, акаж ден изаже шке пиалым чоҥен илат. Ачашт Эдуард Иванович Буймо ял шотан илемым вуйлата, Марий мер каҥашын еҥже. Авашт Марина Семёновна школышто тӱҥалтыш класслам туныкта. Михайловмыт изижге-кугужге пашаче да чулым улыт, спорт дене пеҥгыде кылым кучат. Телым ече дене коштыт. Кеҥежым велосипед дене кудалыштыт.
– Ӱмаште да теният ачам йолташыже-влак дене пырля Агрыз районын чекше гыч Агрыз ола марте 120 меҥгым велосипед дене кудал эртеныт, мыят нунын дек ушненам. Эрдене ныл шагатлан тарваненна да кечывал эрталтымеке палемдыме верыш миен шуынна. Ӱмаште ты мероприятийым Кугу Отечественный сарыште сеҥымылан 80 ий теммылан пӧлеклыме. Тунам 80 меҥгым эше куржынна. Тений гын тидыже районысо велопробег кышкарыште лийын, – каласкала И.Михайлова.
Ешыштын шке мӱкшотарышт уло. Шошо гыч шыже марте тушто ешге тыршат. Мӱкш деч лӱдмаш уке, ройымат шке погем, мӱйымат тулаш полшем манын палдара Ирина.
Михайловмытын мӱйыштым да шке ыштыме сатуштым районыштышт веле огыл, моло вереат шукын палат. Агрыз район администрацийын йодмыж почеш ты еш пӧлек набор-влакым ынде икмыняр ий ямдыла. Ик тыгай пӧлек наборыш изи ате мӱйым, шоптыр да эҥыж вареньым, пергам, прополисым, шудо чайым пыштат. Чылажат – пайдале да шке кид дене чоным пыштен ямдылыме. Тыгай пӧлекым нуно родыштланат кучыктат.
Михайловмытын икшывышт ынде чылан тӱрлӧ олаште илат гынат, шочмо суртыш эре куанен вашкат. Телым У ий пайремлан чылан пырля погынымо жап поснак чоным ырыкта. Тыгай годым нуно пырля подкогыльым кӱэштыт. Тыглайым огыл, сюрпризаным. Кӧлан мо логалеш: пурс пырче – пеҥгыде тазалыклан, полдыш – у вургемлан, шергаш – поянлыклан. Тыге пырля жапым эртарыме кужу жаплан шарналт кодеш да идалык мучко чоным ырыкта.