Провой кундем Ташнур ялыште илыше Варфоломеевмыт ешыште кум эрге кушкын, Сергей – межнечышт. Ача-ава эрге-шамычым изинек пеҥгыдылыклан, ответственностьлан, порылыклан туныктеныт.
– Мый кум эрге кокла гыч эн изиже улам. Ялыште иленна, садлан паша ятырак лийын. Сурт-печыштына кажныже шке сомылланна мутым кученна. Икте вӱдым нумалын, кокымшо вес пашам вораҥдарен, а мыланем арулыкым эскераш ӱшаненыт. Рвезе йоча лийынам гынат, пӧрт кӱварым, кӱмыж-совлам да молымат эре чистоташте кучаш тыршенам, – каласкала Сергей Варфоломеев.
Изинек сай воспитанийым пуышо ача-аван эргышт-влак, чынжымак, поро да пашаче кушкыныт. Тидыжым нунын поро подвигыштат пеҥгыдемдат. Сергей икымше классыште тунеммыж годым вӱдыш пуреҥгайыше ӱдырым утарен. Тудо школ воктенысе ерыште туткарыш логалын. Ӱдырым утарымылан Сергейым «За спасение утопающих» медаль дене палемденыт. Ты случай нерген утарыше тыгерак шарналта:
– Тунам шошо кече ыле. Переменыште уремыш модаш лектынна. Йоча-влак школ воктеысе ерыште ий ӱмбалне юарленна. Рвезе-шамыч ӱдыр-влак деч изиш ӧрдыжтырак модынна. Трукышто ик ӱдыр вӱдыш шуҥгалтын. йоча-шамыч чылан гаяк тушеч куржыныт, а мый шкет шоген кодынам. Тунам ушыштем ӱдырым кузе-гынат утараш кӱлмӧ нерген шонымаш пӧрдын. Мый ий ӱмбалне кийыше кужу укшым верештынам да тудлан шуялтенам. Вара шке кидемым шуялтен, ӱдырым ий ӱмбаке шупшын луктынам. Ты жапыште тунемше-влак кугурак-шамычым ӱжын конденыт. Нуно вӱдыш пуреҥгайышым шокшо классыш пуртеныт да кӱлеш полышым пуэныт. Тыге ӱдырын илышыжым утаренна.
Сергей Варфоломеевым лӱддымылыкым да патырлыкым ончыктымыжлан Пытартыш йыҥгырлан пӧлеклалтше линейкыште пайремлын тауштеныт да медаль дене наградитленыт. Ойлымыж почеш, тылеч вара тудлан пуреҥгайыше-шамычым утараш логалын огыл. Но ты подвигше рвезын койыш-шоктышыжым эшеат пеҥгыдемден. Кызыт шкежат кок шочшан ача. Ешыж дене Звенигово олаште илат, пелашыж дене ӱдырым да эргым воспитатлат. Сергей «Электродвигатель» заводышто инженер-конструкторлан тырша. Ты пашаштат ответственный, пеҥгыде койыш-шоктышан лийман, палемда тудо.