27 мартыште Театрын тӱнямбал кечынже «Театральное Приволжье» округысо фестивальын финалже лиеш. Жюри 14 субъект гыч 28 спектакльым иктешла.
«Театральное Приволжье» фестиваль – ПФО-со мер проект. Тудо Россий Президентын Юл кундем федеральный округышто полномочный представительже Игорь Комаровын полшымыж дене эртаралтеш.
Фестивальыште 6-17 ияш йоча коллектив да 35 ияш марте участник-влак усталыкыштым ончыктеныт. Марий Элын чапшым Волжск оласе лицейын «Синяя птица» школысо театр да Волжский округ Памар тӱвыра пӧртын «ПоролИ» коллективше арала. Нуно фестивальын регионысо этапыштыже сеҥыше лийыныт.
«Йоча театральный коллектив» номинацийыште ойыртемалтше «Синяя птица» театрын изи артистше-влак «Петя и Волк» музыкальный спектакльым (Сергей Прокофьев) ончыктеныт. Порылык осалым сеҥа. Тидым спектакльыште сайын почын пуымо. Тыгодым зритель-шамыч музык тӱня да оркестр дене палыме лийыт.
Регионысо конкурсын «Молодёжный театральный коллектив» номинацийыштыже сеҥыше «ПоролИ» коллектив «Вода чувствует» постановко дене икымше лийын.
Коллектив самырык. Памар тӱвыра пӧрт пелен 2025 ий январьыште шочын. Тушко тӱрлӧ ийготан участник-влак коштыт. Театр коллективын репертуаржат шкешотан: классический пьесымат шындат, авторский драматургият сай верым налеш. «Вода чувствует» пьесе лач авторский. Тудым «ПоролИ» коллективын режиссёржо Екатерина Кудрявцева возен. Зритель семын постановко мылам келшыш. Тӱҥ герой кызытсе жап гыч ожнысыш логалеш. А тыгай йӧным кучылтмаш чонышто эре шижмашым луктеш. Кызытсе илыш гыч эртыше жапыш логалмеке, айдеме кузе шкенжым шижеш? Вет тунам мутланеныт, койыныт, шоненыт вес семын. Историйым пагалыман да палыман. Тидым постановкышто сайын почын пуымо.
Екатерина Арсентьевна ойла:
– 2024-2025 ийлаште Озаҥ оласе тӱвыра институтышто любительский театрын режиссёржо специальностьлан визымше курсышто тунемынам. Тунам диплом пашалан спектакльым шындаш кӱлын. Тудо жапыште мый Олыкъялысе Зинон Прохоров лӱмеш тоштер-пӧртыштӧ пашам ыштенам, театральный коллективем лийын огыл да классике спектакльымат шындаш ӧрынам. Сандене пьесым шке возаш кумылаҥынам.
Иммерсивный спектакльын сюжетше тыгай: экскурсовод Совет Ушем Герой Зинон Прохоров лӱмеш тоштер-пӧртыш толшо-влакым вашлиеш. Аркадий лӱман рвезе тыгай вашлиймашын кӱлешлыкшым ок уж. Экскурсовод дене ӱчашымаш марий калыкын юзо вийжым луктеш. Тидлан кӧра Аркадий ожнысо жапыш логалеш да тушто Зинон лӱман рвезе лиеш. Тудын илышыжым ила. Зинон Прохоровын могай да молан ты подвигшым ыштымыжым ужеш. Да шке жапышкыже герой-влакым шарнаш кӱлмӧ нерген умылымаш дене пӧртылеш.
Изи Зиноным Павел Кудрявцев модын. Тений тудлан 15 ий. Кугыеҥ Зинонын образшым профессионал артист Михаил Александров чоҥен. Спектакльым шындымаште тудын надырже моткоч кугу. Шке шинчаончалтышыже, шонымашыже уло. Мый режиссёр семын утларак реквизитым чын кучылтмо, мизансцене дене пашам ыштенам. А Михаил Павеллан кӧргӧ монологым чын шижын мошташ да калык ончыко тудым лукташ полшен. Спектакльна сай, шонем, пӱсӧ темым тарватыме.
Постановко-влакым «Театральное Приволжье» фестивальын сайтыштыже ончаш лиеш. Иктешлымашым туштак 13 шагатлан вияш эфирыште ыштат.
Фото-влакым фестивальын сайтше гыч да еш альбом гыч налме.