Марий Турек посёлкышто илыше Андрей Арсентьевич шке фамилийже нерген тыге каласкала:
– Фамилийна Павел кугезе-кугезе кочам деч тӱҥалеш – ешыштыже «изи эрге», пытартыш, лийын. Вара – Василий кугезе кочам, Илья кочам да Арсентий ачам. Павел Озаҥсола ялыште илен. Мыят туштак шочын-кушкынам. Ачамын шольыжо, Владимир Ильич, шке жапыштыже «Кугарня» газетыште пашам ыштен. Тудо Изергинмыт фамилиян еҥ-влакым кычалын, нунын дене ваш-ваш серышым возкаленыт. Чылан гаяк марий лийыныт.
Мемнан гай фамилиян-влак районыштына икмыняр ялыште улыт, Арборышто Изергина фамилиян ик ӱдырамаш ила, но ме родо огынал. Эше Кужэҥер, Шернур районлаште, тыгак Киров областьыште Изергинмыт шукын улыт, йотэллаштат, палем, илат.
Ачана, Арсентий Ильич, 1922 ий гыч сарыште кредалын, Кугу Отечественный сар годым Германийыште концлагерьыште ныл ий лийын. Мӧҥгыжӧ 1947 ий мучаште гына пӧртылын. Ятыр ий колхозым вуйлатен. Авана Анастасия Васильевна Олорышто шочын, ава-героине лӱм дене палемдалтын. Ешыштына 10 икшыве, куд эрге да ныл ӱдыр, кушкынна, мый – эн изи. Кызыт визытын кодынна.
Мыйын ӱдырем да эргым улыт. Изам-влакынат эргышт тукымнам шуят. Садлан ӱшан уло: Изергин фамилий ок йом.
Еш альбом гыч налме фото.