1 апрельыште Козьмодемьянск оласе Я.Эшпай лӱмеш калык тӱвыра рӱдерыште «XXVI Игнатьев лудмаш» регионысо шанче да практике конференций лийын. Тений тудын темыже – «Горные марийцы в культурном многообразии и историческом единстве народов России».
Конференцийыш Марий Эл гыч веле огыл, Татарстан, Удмуртий да Чуваший гычат шанчыеҥ, краевед, тӱвыда да образований пашаеҥ-влак ушненыт.
Тений форум Россий калык-влакын икоян улмо идалыклан, тыгак Марий кундемын курык могыржын Россий кугыжанышыш ушнымылан 475 ий теммылан пӧлеклалтын.
Марий Эл Республикысе Кугыжаныш Погын лӱм дене участник-влакым Агропромышленный комплексым вияҥдыме, экологий да пӱртӱс дене пайдаланыме комитетын еҥже Сергей Ильин саламлен.
Пленарный заседаний годым Марий кугыжаныш университетын професоржо историй науко доктор Ананий Иванов «Вхождение горной стороны марийского края в состав Российского государства: исторический выбор» докладым ыштен. Тыгак Озаҥ оласе (Юл кундем) федеральный университетын профессоржо, педагогике науко кандидат Альфия Галимуллина, В.М.Васильев лӱмеш МарНИИЯЛИ-н директоржын шанче паша шотышто алмаштышыже, филологий науко кандидат Галина Эрцикова да Курыкмарий районысо Пайскырык школ директорын алмаштышыже Наталия Павлова докладым лудыныт, кызытсе татар, марий да чуваш поэт-влакын творчествыштышт руш классикылан эҥертымышт, тыгак текстым рушла гыч курыкмарлашке кусарыме нерген ойленыт.
Пленарный заседаний деч вара куд секйийыште конференцийын пашаже шуйнен. Тушто лингвистике, литературоведений да фольклористике, историй да краеведений, образований, тӱвыра да сымыктыш йодышлам каҥашеныт. Кызытсе сылнымут курыкмарий йылмылан, сылнымутан литературым кусарымылан, патриотический воспитанийлан да моло йодышлан тӱткыш ойыралтын.
Игнатьев лудмашын участникше ден уна уна-влаклан мастер-класс-влак эртаралтыныт, тыгак курыкмарий тӱрлызӧ Фелония Шестакова дене «Узоры памяти народной» семинар-практикум лийын. Яков Эшпай лӱмеш рӱдерын фойештыже тудын марий тӱр выставкыже ончыкталтын, тыгак Марий Элын историйже да тӱвыраж дене кылдалтше книга-влак ужалалтыныт.
Кугыжаныш Погынын фотожо.