Йошкар-Оласе Бауман лицейын тунемшыже Мария Ошуева П.Лумумба лӱмеш калык-влак келшымаш Российысе университетыште (РУДН) эртаралтше «Университетские смены» проектыш ушнен. Тушто ӱдыр ты вузышто тунемше журналистын профессийже дене палыме лийын.
Ончыкылык профессионал-влаклан келыштаралтше сменыште элнан вӱдышӧ журналистше-шамыч тӱрлӧ лекцийым, мастер-классым эртареныт. Тыгак университетыште тунемше студент-влакын илышышт дене палдареныт. Тылеч посна школьник-шамычлан Моско олаште экскурсийым организоватленыт. Ӱдыр-рвезе-влак ВДНХ-ште, «Царицыно» тоштер-заповедникыште, Воробьёв курыкышто да моло вереат лийыныт. Вес элласе студент-влак дене кутырымо да нунын тӱвырашт, калыкышт нерген утларак пален налмаш ятыр жаплан шарнымашеш кодын. Мариян палемдымыж почеш, элнан вӱдышӧ журналист-спикер-влак дене вашлиймаш кугу кышам коден. Нунын эртарыме оҥай лекцийышт кумылым савыреныт. А университет йот йылмым тунемаш шонышо, тӱрлӧ калыкын тӱвырашт нерген пален налаш кумылан-шамычлан, чынжымак, келшен толеш.
Палемдыман, «Университетские смены» проект «Молодёжь и дети» нацпроект почеш илышыш шыҥдаралтеш. Тудо ӱдыр-рвезе-влаклан профессионал корным чын ойырен налаш виктаралтын.