У Торъял район Ошканэҥер ялын шочшыжо, «Сита» позывноян (лӱмжым ончыкташ ок лий) марий пӧръеҥ СВО-ш 2022 ийыште мобилизаций почеш каен. Шукерте огыл мӧҥгыжӧ отпуск жаплан толын ыле. Туддене Йошкар-Олаште «Сердце матери» организацийын офисыштыже вашлийна.
– Тунам, 2022 ийыште, йолташем ден когылянна верысе администраций гыч йыҥгыртеныт да ик арня гыч кайыман манын ойленыт. Сергей дене ик ял гыч улына, тудо лишыл йолташем.
Ача-авам, пелашем, конешне, пеш ойгыреныт. Пелашем гын тиде уверлан мыняр-гынат ямде лийын, шонем. Вет каяш кумылем улмо нерген туддене тылеч ончычат кутыренна: мобилизаций почеш огыл гын, доброволец семын каем манынам ыле.
Марий йылмым палыме полша
Советский район Вечын селасе техникумым автомеханиклан тунем пытарыше рвезе Йошкар-Олаште ик предприятийыште экскаваторщиклан пашам ыштен. Специальный военный операцийыш кайыдеат кертеш ыле, но рвезе чакнен огыл, вет тушто тудын лишыл йолташыже, родыжо Шочмо элна верч шогеныт. Ошканэҥер гыч тунам кум йолташым Ульяновскыш ужатеныт. Тушечын Херсонский направленийыш кумыньыштымат колтеныт. Жап эртымек, корнышт ойырлен.
«Сита» – гаубичный артиллерийский батарейын старшинаже. Мо-кузежым чылажымак каласкалаш ок лий манын умылтарыш тушто шуктымо обязанностьшо нерген. Да ешарыш: но кеч-кунам чоҥештен толын кертеш. «Сита» позывнойжо нерген йодмемлан тыге палдарыш: «Позывноем эше армий годсек аралалт кодын. Пырля служитлыше йолташем-влак, фамилием дене кылден, мыйым тыге маныныт».
«Сита» дене пырля марий салтак-шамыч шукын Шочмо элнам аралат. «Ончылнырак» улшо марий салтак-шамычлан шочмо йылмым палымышт полша. Раций гоч марла мутланымышт годым нуным колыштыт гынат, мом ойлымыштым вик огыт умыло – кусарашышт жап кӱлеш.
Мӧҥгыштӧ вучат
Юля пелашыж ден Миша эргыже Йошкар-Олаште илат, аралышыштын вашкерак мӧҥгӧ пӧртылмыштым вучат. Изи падырашыжын ош тӱням ужмыж годым ача Юля пелен лийын кертын огыл – эргыжым роддом гыч колтымыштлан гына толын шуын.
– Эргына шочмо нерген уверым пелашем телефонышкем возен колтен. Тунам чонем каласен мошташ лийдыме куан авалтен. А мӧҥгӧ толын пурымеке, шке чукайым кидыш налаш – эшеат куанле. Миша куржталешат, «ава», «ача» мут-влакым ойла, – манеш самырык ача.
Задачым шындыме – шуктыман
Конешне, ныл ий жапыште шуко мо вашталтын, шуко ужалтын манын палдарыш «Сита».
– «Сердце матери» организацийлан эре тауштем. Волонтёр-влак нерген тушто служитлыше салтак-шамыч деч пален налынам. Заявке почеш эре полшен шогат. Пуда, скоба, моло материал землянкым чоҥымаште эре кӱлыт. Шкем шке арален кодымо инстинкт нигуш ок йом – землянкым чоҥен, тусо условийыштат илаш тунем шуат.
Вуй ӱмбалне «кайык-влак» эре чоҥештылыт. Машина дене кудалме годым мемнамат поктылыныт. Йӧра, тӱрлӧ маневрым ыштен, утлен кертынна. Тыгай годым мо лиеш – тудо лиеш, задачым шындыме – шуктыман манын вуйышто пӧрдеш. Чонлан чот йӧсӧ годым еш, мӧҥгӧ нерген шонымаш полша, – каласкала самырык пӧръеҥ.
Кызыт «Сита» – уэш специальный военный операций кайыме верыште. Но кажне гана шочмо кундемыште отпускышто лиймыж годым шӱгарлаш тукым изаж дек миен толеш – пӧръеҥ 2024 ийыште Бахмутышто колен. Да кажне каныш деч вара ешыж дене чеверласымыж годым марий салтакым ик шонымаш гына авалта: вашкерак тиде пуламыр пытыже, мӧҥгӧ таза пӧртылаш. Тек тыгакак лиеш.
Еш альбом гыч налме фото.