Екатеринбург олаште «Гардероб – традиции в моде» калык вургем ончер почылтын.
Тушто руш, коми-пермяк, одо, пошкырт, татар, марий да моло калык вургемым (тыглайым веле огыл, стилизоватлыме ден авторскийымат) чумырымо.
Экспозицийыште – XIX курымысо пайремыш чийыме курыкмарий костюмат (стилизаций элементан реплике). Тудым Курыкмарий район Йоласал селасе тӱвыра да ремесла пӧртыштӧ ямдыленыт. Тидын нерген ты пӧртым вуйлатыше Нина Тятюкова палдара:
– Ӱмаште «Наследие Урала» калык вургем конкурсыш ушненам да «Стилизованный костюм» номинацийыште кокымшо верым налынам ыле. Организатор-влак мыйым шарнен кодыныт да тений ты оласе вес организаций «Гардероб – традиции в моде» ончерыш ушнаш ӱжын. Ончерым почмашке мияш темленыт, но шкеже каен омыл, костюм-влакым гына колтенам.
Ончер ноябрь кыдалне мучашлалтеш.