18, 19, 20 сентябрьыште элна мучко Россий Кугыжаныш Думыш депутат-влакым сайлымаш эртен. Южо кундемыште верысе погынымашыш депутат-влакым ойыреныт. 21 сентябрьыште Марий Элысе Избирком сайлымашын лектышыжым иктешлен.
Марий Элыште сайлымашке 256 тӱжем утла еҥ ушнен, тидыже республикысе избиратель-влак кокла гыч 49,46 % лиеш. Партийный списке почеш йӱклымаште ончылно Шернур округ кая, тушто 59,87% сайлыше йӱклен. Кокымшо вер – Килемар округын (59,24%), кумшо вер – Параньга районын (55,03%). Тыгак Марий Турек (51,95%) ден Юрино район-влак (51,55%) чолгалыкым ончыктеныт.
Марий Элысе Избирком дистанционный элекрон йӱклымашке шуко еҥ ушнымым палемден. Тиде йӧнлан 74 598 еҥ эҥертен, тидыже йодмашым пуышо-влак кокла гыч 93,83% лиеш.
Марий Элын Избиркомжын иктешлымашыж почеш, 27-ше №-ан Марий Элысе ик мандатан округ почеш КПРФ партий деч Сергей Казанков сеҥышыш лектын, тудын верч 134 490 сайлыше (52,78%) шке йӱкшым пуэн. Кокымшо верыште – «Единый Россий» деч Наталья Козлова (60 004 сайлыше (23,55%) шке йӱкшым пуэн). Регионыштына кум лидерым 16 441 йӱкым погышо Андрей Гаврилов (6,45%) петыра. Наталия Глушенко 4,68% йӱкым поген, Алексей Шерстобитов – 4,55%, Павел Свинин – 2,84%, Николай Иванов – 1,60%, Анастасия Макарова – 1,02%, Ольга Мишина – 0,79%.
Партийный списке почеш республикыштына «Единый Россий» партий эн шуко – 43,57 % – йӱкым поген. Моло партий-шамыч шотышто йӱк-влак тыгерак шелалтыныт: КПРФ – 29,87%, ЛДПР – 7,93%, «Новые люди» – 7,58%, «Справедливая Россия» – 3,97%, «Партия пенсионеров» – 2,68%, «Коммунисты России» – 1,06%, «Зеленые» – 0,95%, «Родина» – 0,63%, «Партия прямой демократии» – 0,24%.
Сайлымаште 2114 мер эскерыше порядкым терген. Шукыштым регионысо Мер эскерымаш штаб ямдылен. Мер эскерымаш рӱдер сутка мучко пашам ыштен, специалист-влак видео почеш эскереныт. Тыште 630 волонтёр полшен.
Сайлымаш годым ик нарушенийым пален налме. Медведево район Азаново селасе 343-шо избирательный участкыште участковый избирательный комиссийын членже бюллетень-влакым яшлыкыш кудалтен. Нуным чын огыллан шотлымо, комиссийысе кум еҥым паша гыч кораҥдыме, чыла материалым Следственный комитетыш да МВД-ш колтымо.
Сайлымаш годым да туддеч ончыч Марий Элысе Избиркомыш, территориальный да участковый избирательный комиссийлаш 113 вуйшиймаш пурен. Тидыже 2021 ийысе сайлымаш деч ныл пачаш шагалрак. Чыла вуйшиймаш гыч 18-жым гына чынлан шотлымо.
– Тиде неле сайлыме кампаний лийын. Тудлан шуко пашам ыштыме, кум тылзе утла чот ямдылалтме. Лӱдыкшыдымылыкым ышташ чыла мерым кучылтмо. Садлан сайлыме паша кӱрылтде каен, – иктешлен Избирком председатель Ирина Татаринова.
Йӱклымашын лектышыжым Россий Федерацийын Рӱдӧ сайлыме комиссийышкыже колтымо.
Марий Элыште Мер эскерымаш штабым вуйлатыше Евгений Кузнецов:
– Ӱшандарен каласен кертына: республикыштына сайлымаш чын эртен. Избирательный комиссий, Мер эскерымаш штаб шке пашаштым сайын шуктеныт. ДЭГ системат ӱшанле, йӧнан. «Единый Россий» партийын федеральный партийный списке почеш сеҥымашыже да КПРФ деч кандидат Сергей Казанковын ик мандатан округышто ӱшанлын ончылно улмыжо процедурын арулыкшым раш ончыкта, вет кагаз бюллетеньыштат, ДЭГ дене йӱклымаштат нунак ончыко лектыныт.