«Профессионалы» чемпионатын иктешлыше (регион-влак кокласе) этапыштыже Марий Эл гыч студент-влак той медальым да «За профессионализм» 11 медальоным сеҥен налыныт.
Ты этапыште республикнан чапшым профессиональный шинчымашым пуышо организацийлаште тунемше 37 ӱдыр-рвезе 37 компетенцийыште арален. Нуно элнан 18 регионыштыжо эртаралтше таҥасымашлаште лийыныт. Марий Элыштат 19-23 апрельыште «Мастер лесного дела» компетенцийыште Российысе 9 регион, тыгак Беларусь ден Казахстан республикла гыч конкурсант-шамыч таҥасеныт.
Марий Радиомеханический техникумын студентше Данил Атлашкиным «Оптоэлектроника» компетенцийыште той медальым налмыж дене саламлена.