11-12 апрельыште Медведево посёлкысо «Витязь» ФОК-што Россий Герой, старший лейтенант, землякна Дамир Шаймарданов лӱмеш дзюдо дене Всероссийский таҥасымаш лийын. Тушко элнан коло утла регионжо гыч шӱдӧ утла наре атлет толын.
Таҥасымашын организаторжо – «Защитники Отечества» фондын Марий Элысе филиалже. Тудым «СВОих помним» проект почеш эртарат. Мероприятий спецоперацийын салтакше-влак нерген шарнымашым аралымылан виктаралтын. Тудо тыглай таҥасымаш семын веле огыл эртаралтеш, а мемнан тыныслыкна верч шогышо салтак-влакым пагалымым да нунын подвигышт дене кугешнымым ончыкта. Турнир тыгак вес регионласе спортсмен-шамыч дене кылым пеҥгыдемдымылан, молодёжьым спортлан шӱмаҥдымылан, таза илыш-йӱлам кучаш кумылаҥдымылан келыштаралтын.
Палемдыман, Всероссийский кӱкшытан таҥасымашыште сеҥыше атлет-влак Российын спорт мастерышкыже нормативым шуктеныт.
Марий Элысе Спорт министерствын ВК-се тӱшкаж гыч налме фото.