29 март гыч 2 апрель марте Тольятти ола округышто «Волга-Юнпресс-2026» йоча да самырык журналистике, экранысе творчество тӱнямбал фестиваль эртаралтын.
Тушко 350 журналист ден экранысе творчествын мастарже, заочный турын 1000 утла участникше ушненыт. Нуно фестивальын номинацийлаж почеш рекламе роликым, телесюжетым, телепередачым, документальный ден игровой фильмым, музыкальный клипым, мультфильмым ямдыленыт, тыгак «Тольятти – турист-влаклан келшыше ола» теме дене творческий заданий-влакым шуктеныт.
Режиссёр, актёр, ВГИК-ын преподавательже да моло медийный еҥ-влак (Виталий Калинин, Валерий Ткачев, Роман Серебряный да молат) участник-влаклан мастер-классым ончыктеныт.
Марий Элын чапшым Йошкар-Оласе «ЗУМ» йоча киностудий арален. Тушко 8 еҥ миен коштын. Киностудийын заочный конкурсыштыжо «Письма маме» историко-документальный фильмыштлан И.В.Жилавская лӱмеш спецпризым кучыктеныт; тыгак «Мальчик из села Поповка» ТВ сюжетыштым 2-шо степенян диплом дене палемденыт. Очный конкурсышто кадет-влак нерген «Весна на плацу» документальный фильмышт да тӱрлӧ калык нерген «Стройка дружбы» ТВ сюжетыштат 2-шо степенян дипломым суленыт.
Российыште национальный тӱсым шымлен, творчестве ден журналистике гоч ончыктымылан «ЗУМ» киностудийын пашаже-влакым Гран-при дене акленыт. Тыгак SMM пашам шуктышо София Чрелашвилилан (Йошкар-Оласе 29-ше номеран школ гыч) 3-шо степенян дипломым кучыктеныт.