Тений Йошкар-Олаште 7 августышто эртаралтше «Какшан сер ӱмбалне» IV регион-влак кокласе авторский муро да поэзий фестивальыштына самырык участнице Диана Морозова «Исполнитель-вокалист» номинацийыште 2-шо верым налын.
Тушто тудо, гитарым шоктен, Марина Марин «Ладыра куэ воктене» мурыжым мурен.
Диана Морозова – Параньга район Кугу Пумарий ял ӱдыр. Мураш эре йӧратен, а 2024 ийыште эше гитарым шокташ тунемаш кумылаҥын. Тидлан тудым Шернур кундем гыч самырык мурызо да гармонист Александр Коновалов туныктен.
– Марий кундемыштына Игорь Гориновым (СВО-што вуйжым пыштен) уста гармонист семын шукын палат. Тудо мыйын тукым изам. А Александр Коновалов изамын йолташыже лийын. Игорь тудым мыйым гитар дене шокташ туныкташ йодын. Ынде кок ий ты семӱзгарым шоктем. Мылам келша, – манеш Диана.
Д.Морозова 10-шо классыште тунемеш. Чолгалыкшым тӱрлӧ аланыште ончыкта. Баскетболла, волейболла, футболла модеш. Командыж дене школын чапшым спортын нине видыштыже районысо турнирлаште арала.
Районышто, республикыште эртаралтше тӱвыра мероприятийлаш кумылын ушна. Мутлан, Марий тӱвыра рӱдерын эртарыме йоча Ӱярня пайремыште калык муро, такмак-влакым, пайрем йӱлам палымым ончыктен.
Дианан йӱкшӧ чынжымак виян да чонеш логалше. Кӧ пала, можыч марий эстрадыште лишыл жапыште у шӱдыр чӱкталтеш.
Ончыкшым Диана стюардессе лияш шона. Тидлан кызытак кыртмен ямдылалтеш. Англичан, испан, корей йылме-влакым тунемеш. Корей йылме, культур, тудым поснак чот сымыстарат. Иктаж-кунам Кечывалвел Корейыш миен толаш шона.