Рӱдолаштына шочшо да спецоперацийыште лийше Константин Баранов ятыр еҥын шарнымаштыже ӱшанле айдеме семын ила.
Тунемме верыштыже – Йошкар-Оласе 29-ше номеран школышто, тыгак паша верыштыже – ФСИН-ын Марий Элысе управленийжын 6-шо №-ан исправительный колонийыштыже – шарнымаш оҥам, а Россий ФСИН-ын Самарысе юридический институтыштыжо аудиторийым почмо. Тыгак институтын Шарнымаш книгашкыже К.В.Барановын лӱмжым пуртымо.
Илыш корныжым савыралын
Марий мландын эргыже школ деч вара Самарысе вузышко тунемаш пурен. Кодшо ий декабрьыште, Шочмо элын Геройжо-влак кечын, тиде тунемме тӧнежыште Марий кундемын шочшыжо Константин Баранов лӱмеш аудиторийым почмашке аваже Светлана Николаевнат миен коштын.
Тунем пытарымеке, Константин шочмо республикышкыже толын. Эн ончыч УФСИН-ын 4-ше, вара 6-шо номеран исправительный колонийыштыже пашам ыштен. Тудым пашаеҥ-влакат, четлык коклаште шинчыше-шамычат пагаленыт. Сандене Константин Вячеславовичым пытартыш корныш ужаташ заключённый-влакат миеныт. Светлана Николаевна шке эргыжым кеч-кӧ денат айдеме лийын кодаш туныктен. Константин аважын мутшым колыштын. Тудо вет эргыжым 7 ияш годсек шкетынак ончен куштен.
Поро кумылан рвезе, капитан званиян еҥ, вич ий пашам ыштыме деч вара илышыжым вес могырышко савыралаш шонен пыштен да 2020 ийыште Россий Армий радамыште службым эрташ каен. Тыге тудым Ульяновскысо 31-ше отдельный гвардейский десантно-штурмовой бригадышке налыныт. Кум ийлан контрактым подписатлен. Белоруссийыш, моло вере ученийыш коштыныт. Тунам лишыл еҥжылан ойлен: «Бойышто пырля служитлыше-влаклан ӱшанем».
Спецоперацийыште
– Костян 2022 ий 21 февральыште йыҥгыртымыжым кызытат сайын шарнем. Тунам тудо видеосвязь дене пӱтыралын, ученийыш кайымыже да икмыняр жап связь деч посна лийме нерген ойлен. Шкеже чодыра коклаште шога, туп шеҥгелныже военный еҥ-влак тудын семынак чыланат телефон дене кутыркалат – мо тиде тыгай манын, ӧрынат колтенам ыле, а тудо чыла сай, ик жап гыч пӱтыралам манын. 23 февральысе пайрем дене саламлен шым керт, телефоным ыш нал. А вара спецопераций тӱҥалме нерген пален нална, – каласкала ава.
Офицер спецоперацийын икымше кечыж гычак передовойышто лийын. Варажым ик тылзе гыч позиций гыч лектын, аваж деке йыҥгыртен. Телефон пуч гоч аважым икымше шомакше денак лӱдыктен. «Авай, мый илыше улам!» манын, кок гана кугун кычкыралын. Да тушто моткоч неле, ны кочкыш, ны вургем уке, мушкылташак йӧн уке манын ойлен.
Костя – Гостомельский операцийын участникше. Тудо контузитлалтын. Садлан кеҥежым отпускыш колтеныт. Мӧҥгӧ толын. Аваж ден коваже Константиным эмлымвер еда коштыктеныт. Кок арня шогымеке, Ульяновскыш каен, тушто госпитальыш пыштеныт. Изишак эмленыт да спецоперацийыш угыч колтеныт.
– 2022 ий 23 сентябрьыште передовойышто ик задачым шукташ нылытын каеныт. Чоҥештыше дрон зданийыш керылтын. Ик йолташыже вигак колен. Снаряд эргымын мӱшкырышкыжӧ логалын, пулвуй деч ӱлыкыла йолжо кӱрлын. Тудо лектын кечалтше шолыжым шкеак погалтен, шкаланже шке уколым шынден. Варажым вертолёт дене Крымысе эмлымверыш наҥгаеныт. Тушеч ик жап гыч йыҥгыртен да сусыргымыж нерген каласен.
А 30 сентябрьыште Москосо госпитальыш кусареныт. Тунам тушко ачаж дене каенна. Кугурак лиймекыже, эргым ачаж дене кылым кучен. Костялан кажне кечын операцийым ыштеныт. Ондак шкем кучен, а вара тудлан нелырак да нелырак лийын, – кугун шӱлалтен, ронча шке шарнымашыжым Светлана Николаевна.
Эргыже кававомышыш кайымылан тений октябрьыште ныл ий темеш гынат, шинчавӱд деч посна шарналтен огеш керт:
– Спецоперацийыште вуйым пыштыше эргын аваже кундемыштына шагал огыл. А мыйжын эргым Москошто Бурденко лӱмеш госпитальыште шке кидешемак колен – тыгайже, очыни, шкетын гына улам. Ик тылзе орланыш да койынак шулыш. Тиде пеш шучко да лӱдыкшӧ: шинча ончылнак шочшемын колымыжым ужынам, но нимо денат полшен кертын омыл. 24 октябрьыште кайыш.
Шарнымаште ила
«Могай рвезе лийын, кузерак тунемын?» – йодым аваж деч.
– Икымше гыч индешымше класс марте 28-ше номеран лицейыште тунемын. Икмарда тунемше ыле. А вара 29-ше номеран школыш куснен. Тиде тунемме верыште улшо музыкальный школыш тудо изиж годсек коштын, пианино дене шокташ кумылаҥын. Эргымлан келшен, но неле пагытыште семӱзгарым налын пуэн шым керт, тунем ыш пытаре.
Могайрак рвезе… Военный корно дене каяш шонен, чылажымат кӱлеш семын ышташ тыршен. Иктаж-могай йоҥылышым ыштен колтен гын, вигак тудым тӧрлатен.
Школ деч вара Самарыш кайышна, тудо бюджетный верыш пурыш. Йолташыже-влак Йошкар-Ола, Чебоксар да Озаҥ олала гыч ыльыч. Тудым эре моктеныт. Командирын полышкалышыже лийын. А варажым вашлиймаште «Костя тельняшке денак шочын» манын ойленыт. Вет тудо эре военный шӱлыш дене илен, ты шотышто шкешотан рӱдыжӧ чоныштак шинчен.
Самарысе парадыште ошкылын. Тылеч ончычат Йошкар-Олаште ятыр гана парадышке ушнен. Школышто тунеммыж годым – «Гром» военно-патриотический клубысо рвезе-шамыч дене, варажым – УФСИН пашаеҥ-шамыч дене, – каласкалыш С.Баранова.
Герой-десантник эмлымверыште улмыж годым 1 октябрьыште 29 ийым темен. Константиным Патырлык орден дене колымекыже наградитленыт.
Константин Барановым шарныме лӱмеш соцкылысе лаштыклаште тудын нерген патриот, поро да ӱшанле еҥ, чыным йӧратыше, чын салтак манын возымо. Тышке чын десантник манын ешараш гына кодеш. Тудым шуарымаште кугу рольым Российын Геройжо Марк Евтюхин лӱмеш «Гром» военно-патриотический клуб да тудын вуйлатышыже Марсель Фаткуллин модыныт. Эре марш-бросок, куржталыштыныт, купан да чодыран верлаште илен лекташ тунемыныт. Кажне кечын гаяк заниматленыт.
Землякна парашют дене чылаже 100 утла гана тӧрштен. Кугешнена: ВДВ-н ефрейторжо Константин Баранов – Гостомельысе патыр-влак радамыште. Вет ВДВ-н 31-ше ден 45-ше бригадыже-влак Гостомель оласе аэродромым ик тылзе араленыт. Тиде подвиг историйыштына курымешлан возалт кодеш. Теве Ульяновск олаште ик уремлан Гостомельысе десантын Геройжо-влак лӱмым пуымо.