Морко район Кинер кундемна гыч спецоперацийыш 30 наре рвезе шке порысшым шукташ каен, тушечын 8 салтак илыш дене чеверласен…
30 октябрьыште Кораксола ялын кок патыр эргыже лӱмеш мемориал оҥам почынна. Алексей Эдуардович Игнатьев ден Александр Владимирович Александров коктынат Кораксола ялнан пӱркыт кайыкше гай лийыныт, жапше годым Шӱргыял школышто тунемыныт.


Морко ола шотан илем администраций вуйлатыше Валерий Борисов Алексей ден Александрын чын патриот улмыштым палемдыш. Умбакыже Герой-влакын аваштлан, Валентина Георгиевна ден Галина Николаевналан, мутым пуышна. Чон коржмо шомакышт дене ачаштат ушнышт. Геройна-влакын родо-тукым ден пошкудышт, йолташышт, икымше туныктышышт ден класс вуйлатышышт ятыр поро мутым ойлышт.
Шӱргыял школнан ик эн чолга тунемшыже Диана Сергеева Герой-землякна-влак лӱмеш «Лач тыге ме илена» мурым пӧлеклыш. А Герой-влакын тукым шӱжарышт Анастасия Романова «Кочамын серышыже» почеламутым йоҥгалтарыш.
Мемориал оҥам почаш салтак-влакын ача-аваштлан, а пеледышым пышташ Шӱргыял школын эн чолга тунемшыже-влак ден Герой-шамычын тукым шольо-шӱжарыштлан ӱшанышна.
Ме шке Геройна-влакым нигунамат огына мондо, эре шарнаш тӱҥалына, а нунын подвигышт дене ӱмыреш кугешнен илена!
Елена Григорьева, Кораксола тӱвыра пӧрт вуйлатыше.
Морко район.

