Эртыше каныш кечылаште Волжск оласе акваторийыште байдарке дене вӱдым куэн ийме да каноэ спорт дене Марий Элын первенствыже да чемпионатше лийыныт. Тудым пайремлын почмашке Марий Элысе спорт министрын алмаштышыже, регионысо «Герои Марий Эл. Талешке-влак» кадровый программын выпускникше Андрей Черепанов ушнен.
Таҥасымашыш Марий Эл, Ульяновск область, Угарман кундем гыч 60 наре участник толын. Нуно 200, 500, 1000 метрым иймаште вийыштым тергеныт.Мемнан спортсмен-влак 7 шӧртньӧ, 8 ший, 8 той медальым сеҥен налыныт. Таҥасымашын абсолютный чемпионжо лӱмым землякна Давид Родионов сулен. Тудо 3 шӧртньӧ да 1 ший медальым поген.