Марий Элым Вуйлатыше Килемар муниципальный округыш миен коштын.
Форумышто
Тушто «Российысе калык-влак – ик команде» добровольческий форум эртаралтын. Тушко Марий Эл, Киров ден Угарман кундемла гыч 170 утла волонтёр погынен. Нуно спецопераций участник-влаклан полшымо шотышто икте-весе коклаште опыт дене пайлалтыныт.
Марий Элым Вуйлатышын палемдымыж почеш, лишыл еҥлан полшымаш мемнан вӱрышкак шыҥен. «Те, чынжымак, ик команде улыда: шуко нацционалностян, тӱрлӧ ийготан. Кажныжын шке пашаже уло, а тендам иктеш Шочмо элым йӧратымаш да салтак-влаклан полшымо кумыл уша. Нуно тидым пеш аклат, чон шокшыдам, шочмо кундемын кумылжым шижынак шогат. Тиде боецна-влаклан да Сеҥымашлан моткоч кӱлешан», – ойлен тудо.
Килемар школышто тӱрлӧ мастер-класс эртаралтын. Волонтёр-шамыч аралтыш ден талисманым ышташ, тактический кидшолым, маскироватлалтме сеткым пидаш, окоплык сортам ямдылаш тунемыныт.
Юрий Зайцев Килемар округысо еҥ-влаклан наградым кучыктен. СВО участник Сергей Сидельников II степенян «За воинскую доблесть» медалян лийын. Верысе самоуправлений органыште ятыр ий тыршыше Анна Ширяевам Марий Элым Вуйлатышын тауштымашыж дене палемден. Вӹзӹмйӓр йоча сымыктыш школын директоржо Анна Бранькова ден воспитатель Татьяна Васениналан «105-летие образования Республики Марий Эл» шарнымашан медальым пуэн.
Тыгак «Юнармия» толкынын III степенян «Юнармейсая доблесть» знакше дене Килемар школын тунемшыже-влак Дмитрий Гулькиным, Максим Ожигановым да Кристина Соколенком палемдыме.
Вашлиймаш
Варажым Юрий Зайцев самырык вуйлатыше-влакын «Лидеры села – 2025» Всероссийский конкурсын финалисткыже Елена Абдуллаева дене вашлийын. Тудо Килемар муниципальный округын администрацийыштыже кусараш лийдыме пого ден мланде ресурсым виктарыме пӧлкам вуйлата.
Конкурсышто уло Россий гыч 15 тӱжем утла участник лийын. А Марий Элысе 18 участник кокла гыч лач Елена сеҥышыш лектын. Тиде конкурс элнан рӱдӧ площадкылаштыже, Кугыжаныш Думышто да моло вереат эртен.
Елена Абдуллаева вашлиймаште «Лидеры села» конкурс шке вийым тергаш да сай опытым налаш полшен манын. Вет тушто инвестицийым кондаш да мланде участке-влакым оформитлаш полшышо еҥ-влак дене палыме лийын. Еленалан Ялозанлык министерстве дене «Школа молодого фермера» проект почеш чот тыршен пашам ыштымыже да паша опытшо финалыш лекташ полшеныт.
Храмыште
Килемарыш мийымыж годым Юрий Зайцев Святой Илья Пророкын храмышкыже пурен лектын. Тушто настоятель Андрей Романов дене вашлийын да черкылан духовный кыл ден полышым ончыктышо юмоҥам пӧлеклен.
2010 ийыште лийше пожарын пу черкым пытарыме деч вара «Культурное наследие Республики Марий Эл» республикысе целевой программе почеш кермыч гыч у храмым ышташ пунчалме. Тудым 2020 ийыште освятитлыме.
Ты кечынак Марий Элым Вуйлатыше Килемар округым социально-экономически вияҥдыме шотышто совещанийым эртарен. Тушто школым чоҥымо, газификаций да корным ачалыме йодышлам каҥашыме.