Ты арнян Марий Элым Вуйлатыше Юрий Зайцев Волжск олашке миен коштын. Тудо икмыняр участке ден пӧрт вӱд йымаке логалмым ончен савырнен да тушто илыше-влак дене мутланен.
Йошкар-Ола ден Медведево районышто эҥерыште вӱд ташлымылан кӧра ятыр вер вӱд йымалне лийын гын, Волжскышто тыгай ситуацийым шуко лум гына огыл шочыктен. Волжскышто илыше-влак коммерческий кумдык ден арендодатель-влакын лумым жапыштыже шупшыктыдымыштлан вуйым шийыныт. Тидыжак тыгай туткарыш конден.
Шуко лум шулымылан да вӱд погынымылан коллектор ден канализацийлан кугу нагрузко лийын. Сандене вӱдым качатленыт, нелылык гыч лекташ моло йӧнымат кучылтыныт.
Юрий Зайцев Волжск администрацийыште совещанийым эртарен да мутым кучышо пашаеҥ-шамычлан калыкын йодмыжым жапыштыже шукташ кӱштен:
– Чыланышт деч йодам: чыла сомылым жапыштыже ыштыман. Еҥ-влаклан умылтарыман да полшыман. Да, тиде пӱртӱс явлений, но тыгодым туткарыш еҥ-шамыч логалыныт. Мемнан задачына – иктымат ойгышто кодыман огыл, кӱлеш полышым пуыман.
