Йоча лагерьыште пашам ыштынет? Шуко икшыве-влакым шуарынет? Диджей сомылым вораҥдарынет але кугу танцполышто куштыктынет? Тугеже «Вожатый-шамычын школышт – 2026» проектыш ушно.
Тудым Волжск оласе «Поколение» добровольческий отряд ынде ятыр ий виктара. Школ 12 ияш деч кугурак ӱдыр-рвезе-влаклан келыштаралтын. Ты жапыште организатор-шамыч 60 утла вожатыйым ямдыленыт. Нуно «Авангард», «Кооператор», «Белая медведица», «Кичиер» лагерьлаште тыршат.
Вожатыйын школыштыжо тунемше-шамыч кок тылзе теорийым шымлат, ик тылзе школ пеленысе лагерьыште практикым эртат. Курсы деч вара вожатыйын книжкажым, грамотым, верифицироватлыме волонтёр шагатым да лагерьыш пашаш пураш темлыме серышым кучыктат.
Ушештарена, 2025 ий годсек 14 ийым темыше подростко-шамыч лагерьлаште пашам ыштен, да тидлан пашадарым налын кертыт. Икымше урок 22 мартыште тӱҥалеш. Чылаже 30 вер уло. Вожатый-влакын школышкышт ушнаш шонышо-шамыч clck.ru/3SW8NK ссылке почеш йодмашым колтен кертыт.
«Молодёжь Марий Эл» тӱшка гыч налме фото.