Марий Элысе села ден ялласе школлаште агрокласс-влакым почаш индеш миллион теҥгем ойыраш палемдыме. Тудым «Технологическое обеспечение продовольственной безопасности» нацпроектын «Кадры в АПК» федеральный проектше почеш илышыш пуртат.
2026 ийыште кундемыштына эше вич агротехнологический классым ыштат. Тидым Марий Элысе Образований да науко министерствын эртарыме заседанийыштыже пеҥгыдемдыме. Кызыт тудым илышыш шыҥдарыме шотышто партнёр-влакым кычалыт да специализацийым ойырат.
Тачысе кечылан Волжский округысо, Звенигово, Марий Турек районласе школ-шамыч инвестор-предприятий-влак дене пашам ыштат. Тений ты йыжыҥ кумдаҥшаш. Биологий, химий, технологий кабинет-влакым тичмаш агролабораторийыш савыраш оборудованийым наледаш спискым ямдылыме.
Марий Элысе Ялозанлык да продовольствий министерствын сайтше гыч налме фото.