Тений июнь мучаште Марий Элысе Образований да науко министерствыште 2025-2026 тунемме ийлаште олимпиаде движенийыште сеҥыше ӱдыр-рвезе-шамычлан республикысе Правительствын грантшым кучыктеныт. Тыгай самырык еҥ-влак кокла гыч иктыже – Морко район Коркатово лицейыште тунемше Виктория Краснова.
Шочмо йылме кумылаҥда
Виктория 11-ше классыш вончен. Морко район Кӱчыкэҥер ялыште шочын-кушшо ӱдыр ончыч Эҥерсола тӱҥ школышто тунемын. Ынде Коркатово лицейыште физике-математике профилян классыште шинчымашым пога.
– Эн чот математике предмет келша, садланак тиде профильым ойырен налынам. Эҥерсола школышто тунеммем годым почеламутым да прозым лудмаш конкурслаш чӱчкыдын ушненам, ончыл верыш ятыр гана лектынам. Тыгак ӱстембал теннис дене таҥасымашлаште шкем тергенам, сеҥымашем-влакат улыт, – каласкала В.Краснова.
8-ше классыште тунеммыж годым марий йылмым да литературым туныктышыжо Эльвира Васильевна Александрова ты предмет-влак дене олимпиадыш ушнаш кумылаҥден да кок ий Викториян наставникше лийын.
А кызыт лицейыште Нина Вениаминовна Аркадьева тыгай олимпиадыште кӱкшытыш шуаш полшен шога.
– Поро да чынжымак марий шӱлышан туныктышем-влаклан тауштем.
Кум ий жапыште олимпиадыште эре ончыл верлаш лектынам. Регион-влак кокласе этап марте шуынам. Тыгак Шочмо йылмыла дене федеральный олимпиадыште сеҥенам. Тидлан кок ий почела Марий Эл Правительствын грантшым кучыктеныт, – ойла чолга тунемше.
Слёт, кенеж каныш
Тунеммылан Виктория шуко жапым ойыра. Вес ий тудым ЕГЭ вуча, тидлан кызытак ямдылалт шога. Тылеч посна моло мероприятийлашкат ушнаш тырша. Тений ӱдыр Марий самырык тукым слётын ик участникше лийын.
– Тушко ушнаш туныктышем Нина Вениаминовна темлен. Слётышто марий калыкын тӱвыраже да йӱлаж нерген шуко пален налынам, тылеч вара марий улмем дене эшеат кугешнаш тӱҥалынам манын кертам. Адакшым Российын тӱрлӧ кундемыштыже илыше шкем гаяк марий шӱлышан ятыр ӱдыр-рвезе дене палыме лийынам, южышт дене йолташат лийын шуктенна, – манеш Виктория.
Кызыт ӱдыр ямле кеҥеж пагытлан куанен ила, йолташыже-влак дене шуко жапым яндар южышто эртара, ача-аважлан сурт сомылкам ышташ полша. Да у тунемме ийлан вийым пога.