Марий Эл Правительствын эртыше заседанийыштыже ветеринарно-санитарный службын пашаже да биологический лӱдыкшыдымылык нерген каҥашеныт.
Республикысе Ветеринарий комитетын председательже Евгения Коваль ветеринар паша сайын кая, 2025 ийыште 379 млн вуй вольыкым пижедылше чер деч обрабатыватлыме, 6 тӱжем утла объектыште дезинфекцийым ыштыме манын.
Вольыкым аралыме мероприятийлан 11 млн утла теҥгем ойырымо. Поснак сӧсна-влакым африкан чума да кайыквусым грипп деч аралымаш кугу верым налеш. 56 тӱжем утла вуй вольыклан орымаш деч вакцинацийым ыштыме. Вольык шыл ветеринарно-санитарный экспертизым тичмашнек эрта.
2021 ий гыч ветеринар службылан кок пачаш шукырак шийвундо пуалтеш. Тидыже материально-технический базым уэмдаш да биологический лӱдыкшыдымылыкым пеҥгыдемдаш полша. Нине пашалан 2026 ийыште 416 утла млн теҥгем ойырымо.
Марий Элым Вуйлатыше Юрий Зайцев чыла вере, яллаште еҥ-влакын сурт-печыштыштат, вольык ден кайыквусым шояклыде шотлаш да суртозанлык книгашке пурташ темлен. Тиде йӧн Марий кундемыште ветеринар пашан пайдалыкшым кугемдаш виктаралтеш.