Марий Элым Вуйлатыше Юрий Зайцев Специальный военный операций ветеран-влакын ассоциацийыштын председательже, Патырлык орденын ныл гана кавалерже, «Герои Марий Эл. Талешке-влак» регионысо кадровый программын участникше Роман Возняк дене вашлийын.
– Ассоциацийын тӱҥ цельже – ветеран-шамычым мер илышыш ушаш полшаш, СВО участник-влаклан социальный, юридический могырым полышым пуаш, – ойлен Ю.Зайцев.
Ассоциаций тыгак ветеран-влаклан правам аралыме аланыште, боевой действий участник-шамычлан социальный гарантий-влак шотышто законым саемдымаште да самырык тукымым патриотизм шӱлышеш куштымаште пашам шукта.
Роман Возняк регионым Вуйлатышылан ӱшанжылан тауштен да организацийын пашаж дене палдарен. 2026 ийлан палемдыме ик эн кугу проект – Марий Эл гыч СВО герой-влакым шарныме книгам лукташ. Грант полшымо дене илышыш пуртымо проект 100 геройын илыш корныж дене палдара.
Марий Элым Вуйлатышын пресс-службыжын фотожо.