Звенигово районышто илыше Алик Хуснутдиновлан тӱрлӧ вере кудал кертше коляскым налын пуэныт.
Тыгай йӧн «Защитники Отечества» фондышто ышталтеш. Тушто спецоперацийын участникше-влак да нунын ешыштлан адресно полшат. Ик направленийже – герой-шамычлан реабилитацийым эрташ средствам налаш полшаш: протезым, кресле-коляскым, слуховой аппаратым да молымат.
Алик Хуснутдинов – куд шочшан ача. Тудо спецоперацийыш частичный манме мобилизаций почеш каен. Тушто снайперлан служитлен. Боевой заслугыжлан Алик Хамитовичым Патырлык орден дене наградитленыт. 2024 ий январьыште мине пудешталтмылан кӧра сусырген, да варажым шола йолжым пӱчкаш логалын. Операций деч вара Белгородысо да Москосо госпитальлаште ятыр эмлалтын.
Кодшо ий шыжым «Защитники Отечества» фонд А.Хуснутдиновын илыме верыште адаптацийлан кӱлеш оборудованийым налын пуэн ыле. А кызыт ынде тудо йӧнан коляске дене кошташ тӱҥалын.
Тыгай полышым налаш СВО ветеранлан Звенигово район гыч социальный координатор Елена Иванова полшен. Ынде инвалидностян еҥ сурт кокласе ятыр сомылым шке ворандарен кертеш.
А.Хуснутдинов фондлан кугу таум каласа да эрласе кечылан ӱшаным ок йомдаре.
«Защитники Отечества» фондын регионысо пӧлкажын фотожо.