Марий Элысе Кугыжаныш Погынын Председательже Михаил Васютин, Марий Элысе кӧргӧ политике министр Антон Мирбадалев да эше икмыняр депутат Юрино районыш миен коштыныт.
Нуно пашаче совещанийыш ушненыт. Тушто Юрино районым округыш савырыме йодышым ончалыныт, ты пашан мучашлалтмыжым рашемденыт. Кундемыштына ик вуйлатыме системыш вончымаш бюджет процессым куштылемда да кучемым калык деке лишемда.
Туризмым вияҥдаш
М.Васютин ты районысо инфраструктур ден туристический проектла дене палыме лийын. Кумдыкым уэмдымаш еҥ-влакын илышыштым саемда да Юрино районыш уло Россий гыч толшо турист-влакым ешара.
Райрӱдӧ уэмеш. Ярмиҥга площадьым сылнештарыме, тушто йолешке-влаклан кошташ да ужалаш йӧнан верлам ыштыме. Тыгак Рӱдӧ проспект гыч Парковый урем марте корным олмыктымо.
Кызыт Шереметев замокысо склад-влакым олмыктат, варажым тиде Юрино округысо тӱвыра пӧрт лиеш. Пашам «Семья» нацпроектын «Модернизация учреждений культурно-досугового типа» направленийже дене шуктат. Кызыт вет тыште гына районысо тӱвыра пӧрт уке. Ты пашам М.Васютин ончалын да Шереметев замокым вуйлатыше Дмитрий Немцев дене тоштер комплексым вияҥдыме шотышто вашлийын мутланен.
Ачалыме годым специалист-влак оригинальный элементлам арален кодат. Тӧрза рамым вашталтат, но историйысе семынак тудым пу гыч ыштат. Варажым зданийыште 55 веран зрительный зал, кружок-влаклан кабинет-шамыч, о зал, гримёрный да декорацийлан пӧлем лийыт.
Эше ик проект – Юл эҥер серыште причаллан пырдыжым чоҥымаш. Ончылгоч шотлымо почеш, тышке 2028 ийыште 15 тӱжем да 2030 ийыште 30 тӱжем марте туристым кондаш палемдыме. Причал 2025-2030 ийлаште республикым социально-экономически вияҥдыме программе почеш чоҥалтеш.
Школ ден йочасадыште
М.Васютин капитально олмыктымо зданийлам ончалын. Юринысо С.А.Лосев лӱмеш кыдалаш школым 2025 ийыште модернизаций шотышто регионысо проектыш пуртымо. 2026 ий январьыште ачалаштӱҥалме. Ты контракт 100 млн утла теҥгешке шуэш. Пашам 1 сентябрь марте мучашлыме, да йоча-влак парт коклашке шинчыныт.
Кок пачашан «Термок» йочасадым тений «Семья» нацпроект почеш олмыкташ тӱҥалме. Пашам ты тылзе мучаште пытарышаш улыт.
М.Васютин кок зданийын вашталтмыж шотышто, кугыжанышын калык верч тыршымыже нерген ойлен да Юрино районын сай ончыкылыкшо лийшаш манын.
