Марий самырык театр подростко-шамычлан премьерым ямдыла. Полина Коротычын пьесыж почеш шындыме «Вадик поёт свою музыку» спектакль – ГИТИС-ын музыкальный театр факультетыштыже (Д.Беловын мастерскойжо) визымше курсышто тунемше Егор Тихонын диплом пашаже.
«Вадик поёт свою музыку» – самырык рвезе нерген чоным тарватыше историй. Тудо тӱняште шке вержым кычалаш кая да тыгай кумдыкым чоҥаш шона, куштыжо кажне еҥ шке мурыжым мурен кертеш. Спектакль кызытсе самырык тукымым тургыжландарыше теме-влакым тарвата: шкем мумаш, ум тӱҥалмаш, лӱдмаш ден кокытеланымаш деч кораҥмаш, келшымашым да йӧратымашым аклен моштымаш. Тиде постановко тӱняште шкем кычалше да палыдыме ончылно лӱддымылыкым шижше ӱдыр-рвезе-шамычлан келыштаралтын.
Спектакльын премьерже 11 да 12 мартыште лиеш.
Марий самырык театрын архивше гыч налме фото.