«Защитники Отечества» фонд спецоперацийын ветеранже-влаклан пашам темла, тыгак шке сомылым почаш полша. 2025 ийыште 200 утла ветеран социальный контракт почеш бизнесым почын.
Элым вуйлатышын кӱштымыж дене лекше пунчал почеш социальный контрактын йӧнжӧ кумдаҥын. Такше тудым 2016 ий 1 январь гыч, СВО ветеран-шамыч ешысе кажне еҥлан шотлымо кокла доходым ончыде, подписатлаш лийын. Таче тиде полыш ик эн йодмашанлан да сайлан шотлалтеш.
Статс-секретарь – Россий обороно министрын алмаштышыже, «Защитники Отечества» фондын председательже Анна Цивилёван палемдымыж почеш, тидыже шке сомылыштым кеч вияҥдаш полша ыле.
– Тений гыч фондын инициативыже да Россий Президентын полышыж дене Российыште ветеран-влаклан полшымо посна направлений семын социальный контрактын специальный программыжым пеҥгыдемдыме. Тидлан кӧра СВО участник-шамыч да нунын ешышт ешартыш социальный полышым налыт, амалкалче пашашке чолган ушнен да шке илыш качествыштым ятырлан саемден кертыт. Ынде бизнесым почаш шонышо ветеран-влаклан 350 тӱжем теҥге марте оксам пуат. Ме нунылан чыла этапыштат полшаш ямде улына, – палемда Анна Евгеньевна.
Социальный контрактым спецоперацийыште лийше да I але II группо инвалидлан шотлалтше боевой действийын ветеранже-влак да нунын пелашышт подписатлен кертыт. СВО ветеран тидым ышташ тореш лиеш гын, тыгай права пелашыжлан пуалтеш (пашадымылан шотлалтеш але пашам кычалеш гын).
Эн ончычак ты шотышто ветеранлан «Защитники Отечества» филиалын фондышкыжо мийыман. Фондын пашаеҥже-влак йодмашым налын, ты сомылым ыштен кертме да шинчымаш улмо шотышто рашемдат, документым оформитлыме нерген каласкалат, бизнесым почмо шонымашым шымлат, йодмашым возышо еҥын паша статусшым тергат да социальный контрактым чыла йодмаш почеш ыштыме шотышто темлымашым пуат, тыгак предпринимательстве сомыллан оксам тӱлыде тунемаш йӧным ыштат.
Йодмашым возышо еҥын шке документшым калыкым социально аралыме органыш колтымекыже, тудым да бизнес-планжым межведомственный комиссий ончен лектеш да пунчалым луктеш. Бизнес-планым ышташ «Мой бизнес» рӱдерын пашаеҥже-влак дечат йодаш лиеш.
«Защитники Отечества» фондын Марий Элысе филиалжым вуйлатышын икымше алмаштышыже Татьяна Винокурова социальный контракт шонымашым шукташ моткоч сай йӧн манеш.
– Кызытсе жаплан ме спецоперацийын 18 ветеранжылан темлымашым пуэнна. Пашам ышташ ямде да шке вийжылан ӱшаныше чыла еҥ шке бизнесшым тӱҥалын кертеш. Рвезе-влак кугыжаныш полыш шонымашыш шуаш полша манын умылат, – рашемда Татьяна Николаевна.
Теве Шернур посёлкышто илыше СВО ветеран Игорь Иванов социальный контракт почеш пашам ышта. Тудо шке илыме верыштыже фотосалоным почын, тушто фотосъёмкым ышта, видеом сниматла. Тылеч посна салонышто чыла кумылан еҥлан документым але фотографийжым ксероксым ышташ, печатьыш лукташ йӧн уло.
– Соцконтракт мылам шке пашамым кумдаҥдаш, тыгак ешартыш аппаратур ден материалым налаш полша, – манеш Игорь Эрикович.
«Защитники Отечества» фондын регионысо пӧлкажын материалже негызеш ямдылыме.