Йошкар-Олаште «Библионочь – 2026» российысе калык-влакын икоян улмыштлан пӧлеклалтеш
Тений ты мероприятий 18 апрельыште молгунамсе гаяк С.Г.Чавайн лӱмеш Национальный книгагудышто лиеш.
Акцийын темыже: «Калык-влакын икоян улмышт – Российын вийже!». А девизше – юкагир поэт Николай Куриловын почеламутшо гыч корно: «Я узнал, что у меня есть огромная семья…».
Тӱҥ книгагудо тиде кечын 18 гыч 22 шагат марте пашам ышташ тӱҥалеш.
Уна-влакым усталык вашлиймаш ден презентаций, поэзий кас ден унагудо, модыш ден викторине, тематический салон ден фотозоно, караоке, экскурсий да тӱрлӧ ончер вучат. Сувенир ден сӧрастарыме ӱзгарым налаш лиеш.
Йӱла почеш книгагудыш кошташ кумылан-влаклан лудшо билетым пӧлеклат але яра угыч регистрироватлат.
Мероприятийлашке яра пуртат.