Марий калыкын чапшым МарГУ-што «Эстрадын музыкальный сымыктышыже» направлений дене 4-ше курсышто тунемше Наталья Васильева Белоруссийыште нӧлтен.
Тудо кумдан палыме «Фактор.BY» шоу программе Бобруйск олашке кастингыш шкеак каяш кумылаҥын. А вара август кыдалне кастинг Минск олаште шуйнен.
– Мый тыгай кугу проектын съёмкышкыжо ушнен кертмемлан моткоч йывыртенам, да эше вет тудо вес элыште эрта. Тидыже мылам кугу опытым пуа, талантан еҥ-влак дене палымым ышта, тыгайже участник-влак да жюри коклаштат шукын ыльыч. Марий кугыжаныш университетлан миен толаш йӧным пуымыжлан, вузысо педагогем Людмила Микушкиналан тауштем, – ойла Наталья.
Ӱдырым ача-аваже вич ияшыж годымак мураш тунемаш колтеныт. Сандене кызыт марте тудо вокал конкурсышто вич гана Гран-прим сеҥен налын, Российысе да тӱнямбал таҥасымашлаште лауреат лӱмым сулен. Университетын чапшым Российсе «Студшошо-2023» конкурсышто арален да кок номинацийыште сеҥышыш лектын. «Финн-угор студенчествын миссше-2023» конкурсыштат чапшым арален ыле.
Наталья Васильева «Фактор.BY» вокальный проектын 6-шо тургымжылан сниматлалтын. А жюри радамыште Ольга Бузова, Стас Ярушин, Денис Клявер да Владимир Громов лийыныт. Ӱдыр нунын дене фотокартычкым ыштен.