Кеҥеж каникуллан коча-ковам дене ялыште эре шогенам. Тиде эн куанле пагыт ыле. Пакчаште але моло сурт сомылым пырля ыштыме годым кочам самырык пагытыштыже лийше тӱрлӧ историйым каласкалаш йӧратен. Южгунамже – ӧрыктарышымат. Ик тыгай случай нерген тендамат палдарем.
Тиде историй ӱдырым налмыж почеш лийын. Тунам кочам пошкудо ялыш ик родыжлан пӧртым чоҥаш полшаш коштын. Кеҥеж мучко оралтым леведыш йымак нӧлтен шынденытат, У ий деч ончыч пӧрт кӧргыштӧ мо кӱлешым ыштен шуктынешт улмаш. Тудо ийын ноябрьыштак чот йӱштӧ лийын.
Ик кечынже кочам касеш кодын, но чот йӱштӧ игечат тудлан корныш тарванаш чаракым ыштен огыл – мӧҥгыштыжӧ мӱшкыран пелашыже шкет лийын. Корным вич парням гай сайын палем, ныл меҥгым йолын каяш шагатат ок кӱл манын шоналтен, тудо родыж деч лектын каен.
– Пел корныш шуынамат, йокрокын чучын колтыш. Чодыра дене ошкедем, трук корно воктене кушшо пушеҥге шеҥгеч палыдыме пӧръеҥ лектын шогале. Могай ялыш кайымемым пален налмекыже, мыят тушкак манын вашештыш да пеленем ошкылеш. Мыйже куаненам веле, вет мутланыме годым корным пешыже от шиж. Саде пӧръеҥ кушеч улмыжым, кӧ дек да молан кайымыжым мыланем каласкала. Мутланыме гутлаште кенета чот кужун ошкылмыла чучаш тӱҥале. Корнышто кажне савыртышыжым, воктене кушшо кажне пушеҥгым палымем гай ончыч чучын. А тунам пуйто йӧршеш палыдыме вер дене ошкеденам. Йӱштӧ деч кид-йолемат тӱҥаш тӱҥалме гай чучынат, «Ой, Юмыжат, мо пеш чот кылменам?!» манын пелештышым. Тыге ойлымекем, теве могай томаша лие: воктенем иктат уке, лумышто – мыйын кышам гына. Адакшым корно дене огыл, чодыра дене йӧршеш вес могырыш ошкеденам. Кышам почеш корныш лектымат, мӧҥгем могырыш куржын колтышым, – каласкален кочам.
Мӧҥгӧ толын пурымекыже, ковамлан томаша нерген ойлен огыл. «Кылмыже да мӧҥгӧ миен ынже шу манын, тудым ия чодыра мучко коштыктен», – тунам пелештен воктенем колышт шинчыше ковам.
Елена.
Йошкар-Ола.