Марий Элым Вуйлатыше Юрий Зайцев Шоя-Кузнецовысо интернат-пӧртын пищеблокшым ачалымым аклен.
Тушто ты сомылым Российысе «Социальная поддержка граждан» кугыжаныш программе почеш шуктымо, тидыже интернатыште илыше еҥ-влакын условийыштым саемдаш виктаралтын.
Проектын чумыр акше 127 млн теҥгешке шуын. Республикым Вуйлатыше уэмдыме объектым ончен лектын, тыгодым кондитерский цехыш, пакчасаска складыш, шокшо цехыш да кочмо залыш пурен лектын.
– Мо тыште лийын да мо кызыт – пеш кугу ойыртем. Эн ончычак ты интернатыште илыше-шамычлан сай йӧн ышталтын. Ты проект Российысе Федеральный Собранийын Федераций Советше полшымо дене шукталтын, мый тидлан Валентина Ивановна Матвиенколан тауштем. Мемнан пашанам «Единый Россий» партий тӱрыснек сайлан шотлен да полшен. Пырля ме кӱкшӧ лектышыш шуынна, тидыже республикыште илыше-влаклан моткоч кӱлешан, – каласен Юрий Зайцев.
Реконструкцийлан кӧра пӧлемлам ятырлан кугемдыме. 45 верлан шыгыр зал да ныл смене дене кочмо олмеш ынде 100 верлан у блокым ыштыме, а еҥ-влакым кок смене дене пукшаш лиеш.
У технологический оборудований санитарный да энергетический йодмашлан келшен толеш. Чыла сомылым шуктымо, объект пашам ышташ тӱҥалын.
Реконструкций деч посна 2026 ийыште республикысе бюджет кӱшеш вӱдын да электротулын кӧргӧ сетьше-влакым технически ушымо шотышто 21 млн утла теҥгеаш пашам шуктымо.
Шоя-Кузнецовысо интернат-пӧрт 1936 ий годсек пашам ышта, тушто 301 койко-вер уло. Ты тӧнеж Паша да социальный аралтыш министерствын шулдыр йымалныже, тыште шоҥгыеҥ ден психоневрологический черан инвалид-влаклан сутка мучко полшат. Кызыт тыште 297 еҥ ила.