Пошкырт кундем Мишкан селаште кушшо да кызыт Москошто ешыж дене илыше Наталья Шамуратова шке тукымжо нерген каласкалыш:
– Мемнан тукымвожна Мишкан район Уялыште тӱҥалеш. Ондак тукымнан фамилийже Ахметов лийын.
1928 ийыште Шамурат Ахметович Ахметовын да Пайсылу пелашыжын (ӱдыр фамилийже – Иманбаева) ешыштышт эрге шочын. Тудлан Борис лӱмым ойырен налыныт. Ты жапыште шочшо аза-влаклан ачаштын лӱм дене фамилийым пуэденыт – тыге мыйын кочам Борис Шамуратович Шамуратов лийын. А моло икшывышт (Николай, Зоя, Леонид) Ахметов фамилий денак коштыныт.
Фамилийна Шамурат тюрк лӱм гыч гынат, ме чыланат марий улына. Кочам ӱмыржӧ мучко вуйлатыше должностьлаште тыршен. Тудо мӱкшым эре ончен. 2014 ий 22 июльышто тудо мемнам коден кайыш, а вес ийынже мӱкшыжӧ-влакат пытеныт. Мый лудынам ыле, мӱкш-шамыч посна еҥлан ӱшанле улыт манын.
Кочам деч вара Вера шочын, ты фамилийымак нумалын. Веран ӱдыржӧ, Людмила Саликовна Калинина, Йошкар-Олаште ила.
Борис Шамуратовичын кум йочаже шочын: Геннадий, Виктор да Ольга. Мемнан ешна: ачам Виктор Борисович, авам Кулина Алексеевна, мый, Сергей ден Саша шольым-влак. Шамуратов фамилиян тукым шольо-шӱжарна визытын улыт. Тышеч коктынжо, Артём ден Данил, Шамуратовмыт тукымым шуят.
Эше тукымна музыклан шӱман. Кугезе кочана сай гармоньчо лийын, баяным да тальянкым шоктен. Тидыже моло-влакланат куснен. Геннадий Борисович Алексей Искандаров лӱмеш Марий капеллыште мурен, ачам Виктор Борисович баян дене мастарын шокта. А Саша шольым Стерлитамакысе тӱвыра техникумым баян класс дене тунем пытарен.
Еш альбом гыч налме фото.
Подпись фото йымаке: Наталья Марпединститутышто тунеммыж годым чолга студентке ыле.