Самырык еҥын вий-куатше йоргыктен лекше памаш гай. Ӱдыр-рвезе-влак шке мастарлыкыштым, моштымыштым тӱрлӧ аланыште терген ончат. Волжский район Мучашъер гыч Татьяна Веселоват йочаж годым гимнастике денат заниматлен, спектакльыштат модын, тунеммаштат ончылно лияш тыршен. Кызыт ӱдыр «Политехник» кӱшыл колледжыште «Сетевое и системное администрирование» специальностьлан икымше курсышто тунемеш.
«Ешем – тӱҥ эҥертышем»
Тыге ойла марий студентке. Таня такшым Йошкар-Олаште шочын. Ача ден аваже ойырлымеке, аваже вес пӱрымашым вашлийын. Тыге аваже, акаже да тудо ачалийшыжын шочмо районышкыжо илаш кусненыт.
«Пиалан улам. Ешем кугу. Коча-ковам-влак, Юмылан тау, илат. Ачам дене кылем сай да пеҥгыде. Настя акам, Матвей шольым улыт. Ваш пагалена, йӧратена да эре полшен шогена», – манеш Т.Веселова.
Школыштат, колледжыштат чолгалыкым ончыкта
Таня Шарача кыдалаш школышто шинчымашым поген. Тыршен тунемын. Руш да марий йылмыла дене олимпиадыште участвоватлен. Тӱрлӧ конкурсыш чӱчкыдын ушнен. Тудо каласкала:
– Ик верыште шинчаш ом йӧрате. 1-6-шо класслаште гимнастике дене секцийыш коштынам. Вара «Движение Первых» толкыныш ушненам да тӱрлӧ вере мастарлыкем ончыкташ тӱҥалынам. Мутлан, школысо «ЭЙСПараты» командын участникше лийынам. 2024 да 2025 ийлаште командына тэг-регби дене республикысе спорт фестивальыште участвоватлен. Ончылий спортын контактдыме ты видше дене кумшо верым налынна, а ӱмаште – икымшым.
Тылеч посна мый школ пеленысе «Пламя» театр кружокыш коштынам. Тудым Людмила Алексеевна Томцева вӱден. Социальный спектакльым шынденна: у да кызытсе саманлан келшыше проблемым эре нӧлталме. Буллинг темылан пӧлеклалтше постановкынам ик эн виянлан шотлем.
«Живая классика» сылнымут конкурсышко эреак ушненам.
Школ годым артист профессийым йӧратен шынденам да Палантай лӱмеш тӱвыра да сымыктыш колледжыш «Актёр искусство» специальностьлан тунемаш пурынем ыле. Но конкурс, поснак ӱдыр-влак коклаште, кугу лийын, да мый кертын омыл. Но нимат огыл, ончыкыжымк IT-специалист тугеже лиям.
Чолгалыкемым колледжыштат ончыктем. «Мый йӧратем родной элемым» лудшо-влакын республикысе конкурсыштышт участвоватленам. «Политехникыште» ава нерген сочинений конкурслан кандаш строфан почеламутым шке возенам да кокымшо верым налынам. Кызытсе прозым, поэзийым лудаш моткоч йӧратем.
Поро паша
Таня кеҥеж каникул годым йоча лагерьлаште лийын. Шарача школысо лагерьыште шкежат вожатый семын тыршен. Кызыт студентке волонтёр пашалан яра жапшым ойыра.
– Колледжыштына волонтёр организаций уло. Тудын еҥже-влак мероприятий-влакым эртараш, шоҥгыеҥ-шамычлан полшена. «Миска добра» акцийым эртарен, суртдымо пий ден пырыслан кочкышым погена. «Сердце матери» волонтёр штабыш маскироватлалтме сеткым пидаш коштына. Тылеч посна СВО кайыме верыш колташ гуманитарный полышым погена. Окоплык сортам ыштена, салтак-влаклан кумылаҥдыше серышым возена. Поро пашам ыштен, кумылем нӧлтеш, – ойла волонтёр.
Самырык ӱдырын чолгалыкшылан йывыртыде да кугешныде огеш лий. Теве тудо могай уста, чулым марий Тачана!
Еш альбом гыч налме фото-влак.