Медведево район Кыдал Озакъялыште илыше Владислав Аптыкеев шке фамилийже нерген каласкала:
– Шочынамже Морко район Чодырасола ялыште, тиде ачамын шочмо ялже. Ик ияш улмем годым Кыдал Озакъялыш илаш кусненна.
Тукымыштына Аптыки чочой (мыйын кугезе-кугезе кочам) лийын, тудат Чодырасолаште илен. Кугезе-кугезе кочамын лӱмжӧ гычак Аптыкеев фамилий лектын. Ачам Валерьян Васиянович композитор-самоучко ыле, «Роза-Розмари» мурылан семым тудак возен. 2000 ийыште ош тӱня дене чеверласен. 73 ияш авам Татьяна Петровна Медведево районышто шочын, мемнан дене пырля ила. Ешыште мый ик икшыве гына кушкынам. Пелашем дене ӱдырым да эргым ончен куштенна.