6-12 июль – аллергиян черлан профилактикым эртарыме арня.
8 июльышто Аллергий ваштареш кучедалме тӱнямбал кече палемдалтеш.
Аллергий нерген Марий Элысе Тазалык аралтыш министерствын ава лиймым да йоча жапым аралыме пӧлкан советникше Наталья Григорьева каласкала.
Ятыр ий аллергий патологий медициныште ик эн кумдан шарлыше нелылыклан шотлалтеш. Тазалыкым аралыме тӱнямбал организацийын данныйже почеш, ты але вес аллергический реакций але чер дене мландышарын кажне кумшо еҥже орлана.
Тыгодым тыглай правилым шуктымаш нелын черланыме да илышлан лӱдыкшым кондымо деч арала.
Тӱҥалтыш профилактике
Эн ончычак аллергий чер ынже лий манын, аза шочмо деч ончычак профилактике пашам тӱҥалман. Тиде:
мӱшкыран ӱдырамаш рациональный диетым шуктышаш (аллергий реакций улмо годым тыгай кочкышым кочман огыл),
мӱшкыран улмын икымше тылзыж гычак эҥгекым кондышо профессиональный паша деч кораҥман,
эмым врачын кӱштымыж почеш гына йӱман,
тамакым чот шупшмым чарныман, вет тиде йочан эр шижаш тӱҥалмыжлан полша,
чызе шӧрым пукшымаш – аллергий чер деч утлаш полшышо эн кӱлешан корно, тидым эн шагалже йочан куд тылзыж марте шуктыман,
шке жапыштыже ешартыш гипоаллергенный кочкышым пуаш тӱҥалман ( 4-5 тылзаш улмыж деч ондак огыл).
Йырым-йырысе средам эскерыман: пӧртым йытырайыман, кажне кечын мушман, химический вещества ден ароматизаторым шагалрак кучылтман.
Черланенда гын
Вияҥше черым чактарыман. Тидланат йыр улшо кумдыкым йӧнаным да яндарым ыштыман. Тыгак респираторный инфекций профилактикым, аллерген-специфический иммунотерапийым, медикаментозный терапийым эртыман.
Рецедиван аллергий нелылыкым ынже кондо манын, амалым шочыктышо аллерген-влак деч утлыман, вияҥаш полшышо вес черым эмлыман, кугу нелылыкым луктеш гын, индивидуальный планым ыштыман.
Аллергийын шочмыжо иммунный системын пашаж дене чак кылдалтын, сандене кылмыме да моло чер деч аралалтынак шогыман, тыгак иммунитетлан полшыман. Йоча-шамычлан тӱрлӧ да витаминан, микроэлементан кочкышым кочман, ситышын малыман, яндар южышто эре лийман да капкылым шуарыман.
Икшыве-влакын психикыштлан кугу нагрузко улмым эскерыман, стресс деч аралыман, вет утыр чот тургыжланымышт, напряженийыште улмышт иммунный системын пашажым лунчыртен сеҥа.
Сандене аллергиян чер шотышто комплексно профилактикым эртарыме гына айдемын илышыжым саемден да куштылемден кертеш.
Эльвира Терентьева ямдылен.