Ростов областьыште «Профессионалы» Всероссийский чемпионатын иктешлыше йыжыҥже эрта. Козьмодемьянск оласе Индустри да предпринимательстве колледжын студенткыже Алина Ершова элнан эн тале самырык логистше улмыжым пеҥгыдемден.
Ӱдыр «Экспедирование грузов» компетенцийыште шкенжым терген да Российысе тӱрлӧ регион гыч ушнышо 38 участник-влак коклаште нылымше лийын. Ончыкылык логист-влак кум кече профессионал мастарлыкыштым тергеныт. Нуно транспортын грузым шупшыктымо тӱрлӧ видыштыже тӱрлӧ йодышым решатленыт. Землячкынам чыла йыжыҥыштыжат эксперт-наставникше Лидия Валерьевна Волкова вӱден.
Школым – йошкар аттестат дене
Алина Курыкмарий район Озерки ялеш шочын-кушкын. Икымше классым тысе школышто тунемын, вара Козьмодемьянск оласе «Дарование» школ-интернатын художественный пӧлкаштыже шинчымашыжым нӧлтен.
– Жап эртымеке умыленам, ойырен налме йыжыҥ поч оласе Козьмодемьянск оласе 3-шо номеран школыш кусненам. 2024 ийыште тудым йошкар аттестат дене тунем лектынам.
Школ деч вара вес олашке тунемаш каяш лӱдыкшын чучын. Вет ешем, йолташем-влак чылан тыште лийыныт. Варажым шкенан оласе колледжыште логистлан тунемаш лийме нерген пален налынам. Мыланем ты профессий палыдыме, у лийын, садлан ончыч кӧмыт нуно улыт, могай пашам шуктат – умылкаленам.
Кызытсе илышыште логистике – ик эн кӱлешан профессий-влак радамыште. Логист грузым ик вер гыч весыш шупшыктымо сомылым вораҥдара. Тудын тӱҥ задачыжлан грузым жапыштыже да уто роскот деч посна кӱлеш верыш намиен шуктымаш шотлалтеш. Логист-влак тӱрлӧ аланым авалтат, садлан паша моткоч оҥай, – каласкала А.Ершова.
Кызыт ончыкылык логист кокымшо курсышто шинчымашыжым нӧлта. Ойырен налме профессийже почеш шинчымашым тунемме тӧнежыште веле огыл, ешартыш занятийлаштат пойдара. Вет ӱдыр изинек тунемаш йӧратыше кушкын. Тудо туныктышо-влак еш гыч. Аваже, кокаже, коваже ӱдырын шинчымашыжым нӧлташ полшымаште кугу кышам коденыт.
Опыт ешаралтын
«Профессионалы» чемпионатын регионысо йыжыҥыштыже Ершова шке компетенцийыштыже сеҥен. Тылеч вара тудлан таҥасымашын финалыштыже кундемнан чапшым аралаш каяш темленыт.
– Ты таҥасымаш мыланем кугу опытым ешарен. Заданий-влак моткоч оҥай лийыныт. Нуным решатлыме годым пуйто, чынжымак, логистлан пашам ыштымемла чучын. Тидлан чот йывыртенам.
Чемпионатын икымше кечынже авто- да авиаперевозкым организоватлымаште моштымашнам ончыктенна. Кокымшо кечын складысе операцийым чоҥымаште, шуктымо пашанан тӱҥ лектышыже-влакым шымлымаште да лийын кертдыме ситуацийым кораҥдаш тунеммаште шинчымашнам тергенна. Кумшо кече кӱртньыгорно да теҥыз гоч шупшыктымаш сомыллан пӧлеклалтын ыле.
Заданий-влак куштылгыжак лийын огытыл, но мый уло моштымашем 100 процентлан ончыкташ тыршенам. Вес регионысо участник-шамычым коллеге-влак гае ужынам. Вет ме чылан ик пашам шуктенна, – ойла Алина.
Россий кӱкшытыштӧ нылымше вер – тиде изи огыл сеҥымаш. Садлан Алинан профессионал мастарлыкше кугу кӱкшытыштӧ палемдалтын. Конкурсын правилже почеш, вес ийын ӱдыр ты конкурсышто таҥасен огеш керт. Туге гынат моло-влаклан полшаш ямде улам, манеш.
Ушештарена, «Профессионалы» чемпионат «Молодёжь и дети» нацпроектын «Профессионалитет» федеральный программыж почеш да Российысе Минпросвещенийын полшымыж дене илышыш шыҥдаралтеш. Тений ты таҥасымашыште Марий Элын командыже 37 компетенцийыште участвоватла.
Алина Ершован альбомжо гыч налме фото.